भांगरभूंय | प्रतिनिधी
राज्यांत हवाई खेळां उपक्रम करतले पर्यटकांक आकर्शीत
पणजीः गोंयच्या पर्यटनाक अदीक चालना दिवपा खातीर पर्यटन खात्यान हवाई खेळांचो आतां उपक्रम हातांत घेवपाचें थारयलां. हे खातीर पर्यटन खात्यान इत्सुक हवाई खेळां आॅपरेटर्स आनी पायलट्सां कडल्यान अर्ज मागयल्यात. हवाई खेळां नेमांक पाळो दिवन अधोरेखीत केल्ले सुवातेरूच हे हवाई खेळ जातले, अशी म्हायती पर्यटन खात्यान परिपत्रका वरवीं दिल्या.
पर्यटन खात्यान वर्स २०२५-२६त गोंय राज्यांत हवाई खेळां उपक्रम आयोजीत करपा संदर्भात नोंदणी करपा खातीर इत्सुक हवाई खेळां ऑपरेटर्स, टॅण्डम पायलट्स आनी सोलो पायलट्सां खातीर अर्ज मागयल्यात.
हातूंत हवाई खेळां ऑपरेटरांक वेवसायीक हवाई खेळां उपक्रम आयोजीत करुन ते खातीर सुविधांची पुरवण करपाचो आस्पाव आसा. टॅण्डम पायलट हो नोंदणीकृत पायलट म्हण प्रमाणीत आसपाक जाय आनी सोलो पायलट हाचेकडे वैध प्रमाणपत्रा सयत स्वताच्या वा भाड्याच्या उपकरणान स्वतंत्रपणान उड्डाण करपाची तांक आसपाक जाय.
इत्सुकांनी आपले अर्ज ५ नोव्हेंबर ते २० नोव्हेंबर मजगतीं गरजेचीं कागदपत्रां आनी निर्धारीत शुल्का सयत सगले बाबतींत भरिल्लो सकाळीं १० ते सांजेच्या ५ वरांमेरेन अर्ज नोंदणी सुविधा केंद्रांचेर दाखल करचो. उत्तर गोंयांत नोंदणी सुविधा केंद्र, पर्यटन भवन, पाट्टो हांगा आसल्यार दक्षीण गोंयांत नोंदणी सुविधा केंद्र, खात्याची दक्षीण विभाग कचेरी, माथानी साल्ढाणा संकूल, मडगांव हांगासर आसतली.
गोंय हवाई खेळां नेम, २०२५ च्या नेम १९ प्रमाण विमान आॅपरेटरांक दर विमाना फाटल्यान रु. १ लाख, दर टॅण्डम पायलट खातीर रु. १०,०००, दर विदेशी सोलो पायलटां खातीर रु. २,५०० आनी भारतीय दर सोलो पायलट खातीर रु.१,००० इतलें शुल्क आसतलें. हे विशीं स्थापन केल्ली तंत्रीक समिती सगल्या अर्जाची बारीकसाणेन तापसणी करून जे अर्ज सगली पात्रताय, सुरक्षितताय आनी कार्यान्वयन मानकां पुराय करतात त्याच अर्जदारांकूच नोंदणी प्रमाणपत्र दितले.
हवाई खेळां उपक्रमांक लागून उप्रासपी खंयच्याय दाव्यां खातीर, लुकसाणा खातीर वा अपघातां खातीर पर्यटन खातें जापसालदार आसचें ना, अशें खात्यान स्पश्ट करून हे सगले उपक्रम नागरी उड्डाण महासंचालक, भारतीय विमानतळ प्राधिकरण आनी एअर ट्राफिक कंट्रोल हांचे मार्गदर्शक तत्त्वां प्रमाण तशेंच गोंय हवाई खेळां नेमां प्रमाण नेमणूक करून आनी तांणी मंजूर केल्ले सुवातेरूच हवाई खेळ आयोजीत करतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
