भांगरभूंय | प्रतिनिधी
१०० वर्सां परस उण्या काळांतलो दस्तावेज, थळां सांबाळपा खातीर हेरिटेज पॉलिसी
मडगांव : राज्य सरकार इतिहासीक सुवातो, वास्तू आनी दस्तावेज सांबाळटा. इतिहासीक दायज सांबाळपाक वाद विवाद जावचो न्हय म्हणून समितीची स्थापना करतले. १०० वर्सां परस उण्या काळांतलो दस्तावेज, थळां सांबाळपा खातीर हेरिटेज पॉलिसी केल्या, अशी म्हायती पुरातत्वमंत्री सुभाष फळदेसाय हांणी दिली.
मडगांवच्या क्रांती दिसाचे कार्यावळी उपरांत मंत्री फळदेसाय उलयताले. तांणी इतिहासीक वास्तुंचो सांबाळ करपा खातीर सरकार कार्यरत आशिल्ल्याचें सांगलें. ह्या वेळार आमदार दिगंबर कामत हाजीर आशिल्ले.
इतिहासीक सुवातो जपपा खातीर सरकार काम करता. ज्या सुवातांचेर वाद जावपाची शक्यताय आसा, त्या सुवातांचो सांबाळा विशींचे चर्चे खातीर समितीची स्थापना करतले. संबंदीत कुटुंबीयांनी सुवातो ताब्यांत दिवन तांचो सांबाळ करपाची मागणी केल्यार ही प्रक्रिया सुटसुटीत जावपाक शकता. समिती कडल्यान असल्या सुवातांचो अहवाल घेवन, सुवातांच्या धनयां कडेन चर्चा करुन फुडलो निर्णय घेतले. राज्य सरकाराक कसलेच तरेच्या वादा बगर इतिहासीक सुवातो, दस्तावेज संवर्धीत करपाक जाय. हो वाद निर्माण जावचो न्हय म्हणून समिती स्थापन करतले, अशें मंत्री फळदेसाय हांणी सांगलें.
पुरातत्व खात्या वतीन १०० वर्सां परस चड काळांतल्या इतिहासीक थळांचो सांबाळ करता. १०० वर्सां परस उण्या काळांतलीं इतिहासीक थळां पुरातत्व खात्या वतीन सांबाळपा खातीर घेवपाक मेळनाशिल्ल्यान हेरिटेज पॉलिसी हाडून ताचे वरवीं तें सांबाळटले. म्हत्वाचे दस्तावेज, वस्तू, वास्तू सांबाळपाचें काम करतनाच खाजगी सुवतांच्या धनयांक विस्वासांत घेतले. डॉ. फ्रान्सिस लुईस गोम्स हांच्या कुटुंबीयां कडल्यान मागणी केल्यार आनी सुवातेची उपलब्धताय करून दिल्यार तांच्या घरांचें संवर्धन करतले. कोणाच कडल्यान काडून घेवन इतिहासीक वास्तुंचो सांबाळ करप, हो सरकाराचो हेत ना, अशेंय तांणी स्पश्ट केलें.
दो. ज्युलियांव मिनेझीस हांच्या असोळणेंच्या घराचें म्युझिअम करतले अशें सांगिल्लें. हाचेर आमदार कामत हांणी जाप दितना सांगलें, फिलीप नेरी हांचे सयत आपूण दो. ज्युलियांव मिनेझीस हांच्या घराक भेट दिल्ली. त्या वेळार तांच्या कुटुंबीयांनी घर उपलब्ध करुन दिल्यार राज्य सरकार सांबाळ करतलें अशें तांणी स्पश्ट केलें. हेर कसलेच तरेची चर्चा जावंक ना. आतां डॉ. फ्रान्सिस लुईस गोम्स हांच्या घराची जतनाय घेवपाचो मुद्दोय तसोच पडून आसा. कांय इतिहासीक सुवातो ह्यो खासगी सुवातो आसात. त्यो दिवपा खातीर तयार जायनात, अशेंय तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
