भांगरभूंय | प्रतिनिधी
फाटल्या 5 वर्सांत तिकीट विक्रींतल्यान सगळ्यांत चड जोड
नवी दिल्ली, खबरां संस्था ः आग्राची इतिहासीक म्हत्व आशिल्ली मुघलकालीन वास्तूं ‘ताजमहाल’ पळोवपाक संवसारभरांतल्यान पर्यटक येतात. ही वास्तूं परतून एक फावट चर्चेत आयल्या. ताचें कारण म्हणल्यार ताजमहाल फाटल्या पांच वर्सांत तिकीट विक्रींतल्यान सगळ्यांत चड कमाई करपी एएसआय संरक्षित इतिहासीक थळ थारलां. सरकारान सादर केल्ले आंकडेवारींतल्यान ही म्हायती मेळ्ळ्यां.
फाटल्या पांच वर्सांत ताजमहाल तिकेट विक्रींतल्यान ₹297 कोटी येणावळ मेळ्ळ्या. तशेंच 2023-24 अर्थीक वर्सा कुतुब मीनार दुसरे आनी लाल किल्लो तिसरे क्रमांकाचेर आसून अनुक्रमान 23.8 कोटी आनी 18.08 कोटी रुपया येणावळ मेळ्ळ्यां.
केंद्रीय सांस्कृतिक मंत्री गजेंद्र सिंह शेखावत हांणी बिरेस्तारा राज्यसभेंत बरयल्ल्या प्रस्नाक जाप दितना ही म्हायती दिली.
आर्किलॉजीकल सर्व्हे ऑफ इंडियान (एएसआय) फाटल्या पांच वर्सांत वेगवेगळ्या इतिहासीक थळांक भेट दिवपी पर्यटकांकडल्यान तिकेटीच्या रुपांत कितले पयशे एकठांय केल्यात असो प्रस्न केलो. हातूंत वर्सुकी आनी इतिहासीक थळां प्रमाण वर्गीकरण करपाची गरज आशिल्ली. हाचे वांगडाच फाटल्या पांच वर्सांत तिकेट विक्रींतल्यान सगळ्यांत चड येणावळ मेळोवपी इतिहासीक थळा विशींय विचारलें.
ह्या प्रस्नाक जाप दितना केंद्रीय मंत्र्यांनी 2019-20 ते 2023-24 ह्या अर्थीक वर्साची सगळी म्हायती जाहीर केली. तांणी दिल्ले आंकडेवारी प्रमाण ताजमहाल पांच वर्सां सावन हें वळेरेंत पयल्या क्रमांकाचेर कायम उरलां.
मुघलकालीन वास्तुकलेचें एक बरें नमुने आशिल्लें ताजमहाल सतराव्या शेंकड्यांत मुघल सम्राट शाहजहान बांदिल्लें. ताजमहालाक संवसारांतली एक सोबीत इमारत मानतात. अर्थीक वर्स 2019-20त दिल्लीचो लाल किल्लो दुसरे आनी दिल्लीचे कुतुब मीनार तिसरे क्रमांकाचेर आशिल्ले.
जाल्यार 2020-21 अर्थीक वर्सा तमिळनाडूंतले मामल्लापुरम दुसरे आनी सूर्य मंदिर, कोणार्क तिसरे सुवातेर आशिल्ले. 2023-24 अर्थीक वर्सा कुतुब मीनार दुसरे आनी दिल्लीचो लाल किल्लो तिसरे सुवातेर आशिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
