भांगरभूंय | प्रतिनिधी
पायाभूत सुविधा आनी एमएसएमई क्षेत्राचो मुखेल वांटो
पणजीः गोंयच्या अर्थीक विकास म्हामंडळान (इडीसी) अर्थीक वर्स २०२३-२४ खातीर आपलो क्षेत्रवार रीण वितरणाचो आंकडो जाहीर केला. ह्या काळांत म्हामंडळान गोंयच्या अर्थवेवस्थेंत वट्ट रु. ६१७ कोटी इतलें रीण वाटलां. ह्या रिणांतल्यान राज्याच्या पायाभूत सुविधांचे उदरगतीचेर आनी सूक्ष्म, ल्हान तशेंच मध्यम उद्देगा (एमएसएमई) खातीरच्या आदाराचेर भर दिला.
फाटले अर्थीक वर्सात इडीसीच्या अर्थीक आदारांतल्यान पायाभूत सुविधा क्षेत्र हें मुखेल लावार्थी थारलां, जांकां वट्ट रु.३५० कोटी इतलें रीण मेळ्ळां. ही गुंतवणूक वट्ट वितरणाचे तुळेंत सुमार ५६.७% इतली आसा, जी राज्याच्या मूलभूत गरजांच्या विकासा खातीर म्हत्वाची थारतली.
थळावे उद्देजकतेक चालना दिवपा खातीर इडीसीन विंगड-विंगड येवजणे वरवीं आदार दिला:
विंगड-विंगड रीण प्रकारांतल्यान ल्हान उद्देग ह्या क्षेत्राक वट्ट रु.१२३ कोटी मेळ्ळ्यात. मध्यम उद्देग क्षेत्रा खातीर खासा करून टर्म लोन वरवीं छ५५.६३ कोटी फावो जाल्यात. मुख्यमंत्री रोजगार येवजणे खाला रु. २३.०८ कोटी रिणाचें वांटप जालां. जाल्यार गोंय आदिवासी रोजगार निर्मिती उपक्रम वरवी ल्हान उद्योगां खातीर रु. ५.४१ कोटी दिल्यात.
इडीसी वरवीं गोंयच्या पर्यटन आनी सेवा क्षेत्राकय अर्थीक जोड मेळ्ळ्या. हॉटेल्स आनी रेस्टॉरंट्स ह्या क्षेत्रांतल्या वाटपाचो आंकडो वट्ट रु.१९.३० कोटी इतलो आसा. हॉस्पिटल्स आनी नर्सिंग होम्स सारकिल्ले भलायकी क्षेत्रांतल्यो पायाभूत सुविधा वाडोवपा खातीर रु.१.३८ कोटी इतले टर्म लोन दिला. येरादारी क्षेत्राक रु.२.७५ कोटी इतलें अर्थीक बळ मेळ्ळां.
क्षेत्रा प्रमाण रीण वांटप
क्षेत्र – वट्ट रक्कम
साधन सुविधा – ३५० कोटी
टर्म लोन – १५४ कोटी
पर्सनल लोन – ८४.५१ कोटी
मुख्यमंत्री रोजगार येवजण – २३.०८ कोटी
आदीवासी रोजगार निर्मिती – ५.४१ कोटी
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
