भांगरभूंय | प्रतिनिधी
नमस्कार,
इडले, इडले तूंच सांग, कशी गे तूं बदलल्या? गोंयचे आमदार मायकल लोबो हांकांय तूं भावता म्हणून तुजी ते मस्करी करतात. याद जाता आसतली तांकां पानांच्या दोण्यातल्या सान्नांची, गोड सोयेचीं. उपसभापती आसतना मायकलबाब सान्नां घेवन विधानसभेंत येतले व्हय?
गोडेंमुताच्या दुयेसांक लागून आदलेवरी तांदळाची इडली, सान्नां करप देशांत कमी जालां. नव्या रुपांतली इडली गोंयकारच न्हय विदेशीय खातात. मायकलबाब भलायकीमंत्री विश्वजीत राणे हांकां मेळ्ळ्यार इडली भलायकेक कितली बरी तें ते सांगतले. सगल्या धर्मांनी इडली (हीट) वर्साक दोन- चार दीस करतात. मायकलबाबांच्या घरांतय सान्नां आसतात. इडले, तूं दर्यादेगेर शॅकांनी सदां मेळटा तेन्नां मायकलबाबांक आपले मतदार सान्नांपासून पयस वतात अशी भिरांत दिसल्या काय?
मायकलबाब, मंत्री जावपाक साळगांव, म्हापशां, शिवोले वतात? पर्राच्या काळंगांच्या शेतांत इडली सांबार, डोसाचे गाडे कोणाचे? सांबारा वांगडा चटणी हाॅटेलांनी मेळटा, नाल्ल म्हारग जावनय. स्टायल दक्षीण भारताची.
इडले, इडले तूंच सांग, तूं गोंयांत फकत उडप्यांच्याच हाॅटेलांत उरल्या? म्हजे म्हायती प्रमाण घराघरांनी पावल्या, नव्या रुपांत, रंगांत. इडले इडले अशी कशी गे तूं बदलल्या? मूळची तांदळाची आनी उड्डां दाळीची, रव्याची. मुक्तीआदींच गोंयांतय आयिल्ली, केरळचे वाटेन पुर्तुगिजांनी हाडिल्ली, अशें इतिहास सांगता. केरळ, चेन्नय, म्हैसूर, हैदराबाद, पाँडेचरींतल्यान ल्हान- व्हड रुपांनी दिल्ली ते राजस्थान मेरेन तूं आसाच. नसाय कित्याक?
नासणें, जोंधळे, बाजरी, मुगांच्या दाळीची. पांच दाळी मिक्स करुनय इडली करतात. रुचीक तूं सदांच, सांबाराचें रुपय बदलता. इडले, इडले ऋतुमानां प्रमाण
तूं यो, धांपिल्ल्या प्लेटी, ताटांनी भरून यो. शॅकांनी तूं पावता म्हणून तूं संवसारीक जाली. गोंय, कन्याकुमारी, काश्मीरा सावन प्रयागराज म्हाकुंभाक मायकलबाब गेल्ले व्हय? मायकलबाब, मस्का सांगो खायात, इडली सांबारांत त्यो दिसतल्योच अशें ना. त्योय म्हारग नाल्लावरी. मस्का सांगो संवसारांतली सगल्यांत पुश्टीक भाजी. गोंयकार तिचो खूब वापर करतात. म्हस्का सांगो, मानकुराद आंबे, आगशी- ताळगांवच्या वायंग्यांक आदले वरी गोंयची रुच ना. कितली म्हारगाय गे सायबिणी, मायकलबाब सांगतलेच. गृह आधार वाडोवन दिवपाक मुखेलमंत्र्यांच्या फाटल्यान लागतले.
इडले, तशी म्हारगाय तुकाय बादल्या. गाजर, बिटांतल्यान तूं रंगयाळी जाल्या. मायकलबाब, भलायकी मंत्र्यांक मात्शे एकदां दर्यादेगेर व्हरात. इडली बरी काय वायट तांकांच सांगुदी. आरोग्यं धन संपदा, हें चड म्हत्वाचें.
सुहासिनी प्रभुगांवकार
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
