भांगरभूंय | प्रतिनिधी
खबरां संस्था
नवी दिल्ली : इझ्रायलान इराणाची राजधानी तेहरान सयत खुबश्या जाग्यांचेर शेनवारा सकाळीं हल्लो केलो. सुत्रांनी दिल्ले म्हायती प्रमाण एके खबरां संस्थेन दावो केलो, इझ्रायली हल्ल्यांत इराणचे संरक्षण मंत्री अमीर नासिरजादेह आनी रिव्होल्युशनरी गार्ड्स कमांडर मोहम्मद पाकपूर हांकां मरण आयलें.
हे आदीं, इराणी खबरां संस्थांनी सांगलें, दक्षीण इराणांतले एके शाळेचेर क्षेपणास्त्र पडिल्ल्यान 40 विद्यार्थ्यांक मरण आयलें आनी 45 जाण जखमी जाले.
इझ्रायलान अमेरिकेच्या आदारान 10 इराणी शारांचेर हवाई हल्ले केले. हल्ल्या उपरांत, डोनाल्ड ट्रम्प हांणी एक व्हिडियो जारी केला आनी तातूंत म्हणलां, इराणा वयलो हल्लो अमेरिकन नागरिकांच्या संरक्षणा खातीर आशिल्लो.
ह्या हल्ल्याक जाप म्हूण इराणान इझ्रायलाचेर सुमार 400 क्षेपणास्त्रां सोडलीं आनी कतार, कुवेत, जॉर्डन, बरहीन, सावदी अरेबिया आनी यूएईंतल्या अमेरिकन तळांक लक्ष्य केले. तशेंच इराणआन यूएईच्या सगल्यांत चड लोकसंख्या आशिल्ल्या दुबयचेर लेगीत हल्लो केलो.
इझ्रालयान इराणा आडचे आपले नवे मोहिमेक ‘शिंवाची गर्जना’ अशें नांव दिलां. अल जझीरान अमेरिकन अधिकाऱ्यांचो हवालो दिवन खबर दिल्या, ही अमेरिका आनी इझ्रायलाची संयुक्त लश्करी कारवाय आसा. अणूशस्त्रां संबंदांत इराण आनी अमेरिकेंत सुरू आशिल्ले वाटाघाटी मजगतीं हो हल्लो जालो. अमेरिकेचे अध्यक्ष डोनाल्ड ट्रम्प हांणी इराणाचेर हल्लो करपाची धमकी दिल्या. तांणी म्हणलां, हे कारवायेचो उद्देश अमेरिका आनी तिच्या लोकांक धोक्या पसून वाटावपाचो आसा. अमेरिकन सैन्य इराणाचे क्षेपणास्त्र नश्ट करपाचो आनी तांची क्षेपणास्त्र कार्यावळ उध्वस्त करपाचो यत्न करता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
