इझ्रायली पर्यटक बायले सयत दोग जाणांचेर बलात्कार

भांगरभूंय | प्रतिनिधी

हंपी, खबरां संस्था ः हंपी (कर्नाटक) शारांत इझ्रायली पर्यटक बायले सयत दोगींचेर अनवळख्यांनी बलात्कार केलो. तशेंच तांच्या तिगा वांगड्यांक बडोवन उदकांत उडयले. तातूंतलो एकलो आजून मेळूंक ना.
पुलिसांनी दिल्ले म्हायती प्रमाण, बिरेस्तारा रातीं सुमार 11 वरां मजगतीं ही घडणूक घडली. हंपींतल्या सानापूर तळ्याचे देगेर 27 वर्सां पिरायेची इझ्रायली बायल पर्यटक आनी थंयचे होम स्टेची 29 वर्सां पिरायेची बायल ऑपरेटराचेर अनवळख्यांनी बलात्कार केलो. गुन्यांवाच्या वेळार दोगांय वांगडा आशिल्लो ओडिशाचो एक दादलो पर्यटक बेपत्ता आसा. गुन्यांवकारांनी ताका तुंगाभद्र कालव्यांत धुकल्लो, जाल्यार अमेरिका आनी महाराष्ट्रांतले दोग दादले पर्यटक जखमी जाले. जखमींचेर सरकारी हॉस्पिटलांत उपचार सुरू आसात.

एफआयआर प्रमाण, चार पर्यटक आनी होमस्टेची बायल ऑपरेटर भोंवडेर आसतना ही घडणूक घडली. मजगतीं एका स्कुटरीवेल्यान तिग जाण तांचे कडेन येवन पेट्रोल खंय मेळटा अशें विचारलें? होमस्टे ऑपरेटरान तांकां लागीं पेट्रोल पंप ना अशें सांगलें तेन्ना तिगांयनी तिचे कडेन पयशे मागले. तिणें पयशे दिवपाक न्हयकार दिलो तेन्ना स्कुटरीवेल्या तिगांयनी तांकां गाळी सोंवपाक आनी मारपाक सुरवात केली. उपरांत तांणी त्या दादल्या पर्यटकांक कानालांत धुकल्ले. कागाळ दाखल केल्ल्या बायलेन पुलिसांक सांगलें, दादले पर्यटक कालव्यांतल्यान भायर येवपाक यत्न करत आसतना तिगां आरोपींतल्या दोगांनी तिचेर आनी इझ्रायल बायल पर्यटकाचेर बलात्कार केलो. एक दादलो पर्यटक बेपत्ता जाल्ल्यान सोद सुरू आसा. तशेंच आरोपींचो सोद सुरू आसा.