इझ्रायलाचो हल्लो

भांगरभूंय | प्रतिनिधी

फक्त वर्चस्व, सैमीक संपत्त, जमीन, उदकाक लागून झुजां चलतात. हातूंत भड्डटा निश्पाप जनता.

इझ्रायलान परत इराणाचेर हवाई हल्लो केला. तातूंत 6 अणुशास्त्रज्ञांक मरण आयलां, चार वरिश्ठ लश्करी अधिकारी मेल्यात. तर तेहरानांतल्या हेर 78 जाण संवसाराक अंतरल्यात, 300 वयर जखमी जाल्यात. इराणानूय शंबरा वयर ड्रोन सोडून इझ्रायलाचेर हल्लो केला. मात ते वयले वयर फोडले. इझ्रायलान कोणाचेरूय हल्लो केलो काय भोवतेक भारतीयांच्या खोशेक ओतो येता. दोनूय देश अजून आमचे इश्ट आसात, हे ते विसरतात. इराणांतल्यान आमी इंधन, सुको मेवो अजून आयात करतात. हांगाच्यान मसाले, कपडे आनी हेर वस्तूंची थंय निर्गत जाता. इझ्रायलाच्या 200 विमानांनी 330 बाॅम्ब घाल्यात. ह्या ऑपरेशन रायझिंग लायन खाला तेहराना पसून दोनशे किलोमिटर अंतराचेर खोल जमनींत आशिल्ली इराणाची सगल्यांत व्हडली अणू प्रयोगशाळा इझ्रायलाक नश्ट करपाची आसा. तांणी शंबरा परस चड जाग्यांचेर हवाई हल्लो केलो. खास करून अणुकेंद्र, क्षेपणास्त्र निर्मिती केंद्रां आनी सैनिकी मुख्यालयांचेर क्षेपणास्त्रां, ड्रोन वापरून हो हल्लो जाला. इराणान फाटीं इझ्रायलाचेर हल्लो केल्लो. कांय म्हयन्यां पयलीं पॅलेस्टायनाचे हमास हे बंडखोरांचे संघटणेन पयलीं इझ्रायलाची कळ काडली आनी उपरांत सिरीया, इराण, हिजबुल्लाह संघटणा आनी इझ्रायल हांचे मदीं संघर्श वाडत गेलो. हो कालचो हल्लो तर सगल्यांत व्हडलो. ताचे परिणाम कितें जातले, तें येवपी काळूच सांगतलो. संवसार तिसऱ्या म्हाझुजाचे दिकेन नेटान पावलां मारपाक लागला, अशें हमास – इझ्रायल झुजा वेळार भोवतेक सगल्यांनीच म्हणिल्लें. ते हल्ले ही नांदी आनी कालच्या हल्ल्यान पयल्या प्रवेशाचो पड्डो उक्तो जाला. प्रत्यक्ष नाटक सुरू जावचें आसा. तें जावपाक दिवप, ना दिवप हें आतां अमेरिका, रशिया, युरोपी देश, चीन, भारताच्या हातांत आसा. भारत, रशिया, चीनान दोनूय देशांक शांतिकाय पाळपाचो उलो मारला.
इराणान हो हल्लो म्हणल्यार झूज घोशीत करपाचोच प्रकार, अशें म्हणलां आनी संयुक्त राष्ट्रांची मजत मागल्या. तीं मेळपाची शक्यताय तशी उणीच, पूण इराण हातार हात दवरून बसत अशें दिसना. तो हेर अरब राष्ट्रांची गुपीत मजत घेवन इझ्रायलाक बुद्द शिकोवपाक वतलो. ते वटेन इझ्रायलाक अमेरिका मजत करतली. वेळ जावचे पयलींच इझ्रायलान इराणाचेर हल्लो केला अशें अध्यक्ष ट्रम्प हांणी म्हणलां. पोरूं जुलयांत हमासाचो एक मुखेली हानिया हाची तेहरानांत हत्या जाल्ली. सप्टेंबरांत हिजबुल्लाहचो मुखेल नसरल्ला आनी इस्लामीक क्रांतिकारी सुरक्षा दळाचे कमांडर निलफोरुशान हांकां बैरुतांत मरण आयलें. आॅक्टोबरांत तिडकल्ल्या इराणान इझ्रायलाचेर क्षेपणास्त्रान सगल्यांत व्हडलो हल्लो केलो. इझ्रायलान आपल्या हल्ल्या फाटलें कारण सांगलां. इराण अणुबाॅम्ब करता. फुडाराक ते धोक्याचे थारूंक शकतात. हें शिता पयलींच मीठ खावपा सारकें जालें ना? आयज अणुबाॅम्ब सगल्याच देशां कडेन आसात वा ते तयार करतात. तो मागीर गिरेस्त जावं वा गरीब. अर्थीक, राजकी नदरेन मातयेभरवण जाल्ल्या पाकिस्ताना कडेन पसून अणुबाॅम्ब आसात.
इझ्रायल आनी इराण हांचें झूज पेटत जाल्यार आखाती देशांचेर ताचो परिणाम जातलो. विमान येरादारी सध्या बंद आसाच. पर्यटन मळाक धपको बसला. अणू संशोधन केंद्रांतल्यान रेडिएशन जावंक शकता. इझ्रायलान अणुबाॅम्बाचें कारण सांगलांच, मात तांकां स्वताच्या देशाचो हुस्को आसा. हमास, हिजबुल्ला ह्यो संघटणा इराणाच्या आशिर्वादान हल्लो करपाक शकतात, अशें तांचें मत. 10 वर्सां पयलीं अणुकबलात अयशस्वी थारिल्ली. तेंय कारण आसतलें. दुस्मान देशांनी अण्वस्त्रां करचीं न्हय, अशेंय इझ्रायलाक पयलीं सावन दिसता. तांणी इराक, सिरीयाचे अणू रिएक्टर नश्ट केल्यात आनी आतांचो इराणा वयलो हल्लोय हेच खातीर आशिल्लो. इझ्रायलाचेर सतत हल्ले जातात, ताका लागून तो बेजारला. इराणान शेजराच्या देशांनी पांय रोयल्यात, तीय तिडक आसतली. चीनूय नेमकें हेंच करपाक लागला. इझ्रायलान पयलीं सावन आक्रमक धोरण आपणायलां. नाजाल्यार अरबी राष्ट्रांच्या मदीं आशिल्लो हो देश नाच्च जावपाचो. अमेरिका, युरोप इराणाक आडावपाक अपेशी थारल्यात, अशेंय इझ्रायलाक दिसता.
ते वटेन इराण म्हणटा, इझ्रायल आनी अमेरिके सारके कांय गिरेस्त देश तांचे आड कायम भुमिका घेत आयल्यात. इराक सोंपयलें आतां ते आमकां सोंपोवंक सोदतात. आपणाक चेपणा खाला दवरपाक सोदतात. अणू कार्यावळ चालीक लायल्या ती सैमीक उर्जे खातीर, असोय तांचो दावो. इझ्रायलान इराणी शास्त्रज्ञ, जाणकार, लश्करी अधिकारी हांचेर हल्लो करून तांकां मारून उडयले. आमची उदरगत तांकां आवडना. इझ्रायलाक लागून ह्या वाठारांत अशांतताय, झुजा सारकी परिस्थिती आसा, अशें इराणाक दिसता. अणू कबलातींतल्यान इराणाक भायर सरचें, अशेंय थोड्यांक दिसता. अमेरिकेन तांचेर अर्थीक निर्बंध घाल्यात. ताचो परिणाम देशाचेर जाला. हमास, हिजबुल्ला, हुथी हल्लो करतात, ती इझ्रायलाच्या ताब्यांत आशिल्ली इस्लामी आनी पॅलेस्टायनाची भूंय मेळोवपाक. इराणाच्या मतान हे मुक्ती लढे. आमी फक्त आमचें संरक्षण करतात, असोय तांचो दावो. आमी वर्चस्ववादाक विरोध करतात. आंतरराष्ट्रीय मळाचेर आमी फाटीं कशे पडटले, ताचें सपन पश्चिमी देश पळोवपाक लागल्यात, अशेंय इराणाक दिसता.
फक्त वर्चस्व, सैमीक संपत्त, जमीन, उदकाक लागून झुजां चलतात. हातूंत भड्डटा निश्पाप जनता. इझ्रायली हें अणभवत आयल्यात, आतां इराणीय ते वटेन वतात कशें दिसता.