भांगरभूंय | प्रतिनिधी
गाझा, खबरां संस्था: इझ्रायलच्या गाझांत नरसंहार चालूच आसा. काल इझ्रायलान गाझांत खुबश्या सुवातांचेर हल्ले केले. ह्या हल्ल्यांत एके शाळेकूय लक्ष्य केलें. हातूंत २५ जाणांक लासून मरण आयलें. शाळेंत लागिल्ल्या उज्याक लागून थंयचे लोक जिवेच लासून गेले. हे विशीं चड म्हायती प्रमाण, ही एक बालवाडी आशिल्ली. मरण आयिल्ल्यां मदीं रेड कॉसचे दोग कर्मचारी, एक पत्रकार आनी खुबश्या भुरग्यांचो आसपाव आसा. गाझाचो सगल्यांत ल्हान सोशल मिडिया इन्फ्लुएन्सर यकीन हम्मद (११) हाकाय ह्या हल्ल्यांत मरण आयलां.
दुसरे वटेन स्पेनान संवसारभरच्या देशां कडल्यान इझ्रायलाचेर बंदी घालपाची मागणी केली. तीन दिसां आदीं एका दोतोराच्या ९ भुरग्यांक मरण आयिल्लें. जाल्यार एक भुरगें गंभीर जखमी जालें. भलायकी अधिकार्याच्या मतान मरण आयिल्लया भुरग्यांची पिराय ७ म्हयने ते १२ वर्सां मेरेन आशिल्ली. ह्या हल्ल्यांत डॉक्टराच्या घोवाकूय गंभीर दुखापत जाली. इझ्रायली सैन्याच्या म्हणण्या प्रमाण, गाझांत व्हडा प्रमाणांत कारवाय सुरू केली. हे फाटभूंयेर १४ ते २० मे ह्या काळांत हमासच्या ६७० परस चड तळांचेर हल्लो केलो. जातूंत गाझाचे सुमार ५१२ लोक मेले.
इझ्रायलाचो गाझाच्या ७७ टक्के भागाचेर ताबो
इझ्रायलान गाझा पट्टीच्या ७७ टक्के भागाचेर ताबो मेळयला. अल जझीराच्या वृत्ता प्रमाण, आयतारा गाझाच्या सरकारी मिडिया कार्यालयान हो दावो केला. इझ्रायलाचेर नरसंहाराचो आरोप करीत तांणी संयुक्त राष्ट्र आनी आंतरराष्ट्रीय समुदायां कडल्यान रोखडोच हस्तक्षेप करपाची मागणी केली. निवेदनांत म्हणलां, इझ्रायली सैयान बफर झोन, सुरक्षा कॉरिडॉर आनी नेटान गोळीबारा वरवीं गाझाच्या उत्तर आनी दक्षीण भागांचेर ताबो मेळयलो.
७० टक्के इमारती उध्वस्त
गाझाच्या मिडिया कार्यालयान इझ्रायलाचेर गाझा पट्टी पॅलेस्टिनी लोकसंख्ये सावन रिकामी करपाचो कट रचिल्ल्याचो आरोप केला. कार्यालयान म्हणलें, ‘इझ्रायली सैन्य बॉम्बस्फोट करून गाझा नश्ट करता. हाचे फाटल्यान वांशीक शुद्धीकरण आसा. गाझाच्यो ७० टक्क्यां परस चड नागरी पायाभूत सुविधा नश्ट जाल्या आनी १९ लाख लोक बेघर जाल्यात.
हमास नश्ट जायसर हल्ले चालूच उरतले
इझ्रायली अधिकार्यांनी सांगलें, तांचे हल्ले दहशतवादी संघटणा हमासाक सोंपोवपा खातीर आसात. इझ्रायली प्रधानमंत्री बेंजामीन नेतान्याहू हांणी हालींच घोशणा केली, गाझांतली लश्करी कारवाय हमास पुरायेन नश्ट जाय मेरेन चालूच उरतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
