भांगरभूंय | प्रतिनिधी
संवसारीक क्रमवारींत पयले सुवातेर आशिल्ली पोलंडाची इगा स्वियातेक हिका विमब्ल्डन ग्रॅण्ड स्लॅम वस्तादपण सर्तींत अनपेक्षीत रितीन हार घेवची पडली.
क्वॉर्टरफायनलींत तिका युक्रेनाचे एलिना स्वितोलिना कडल्यान 7-5, 6-7 (5) आनी 6-2 अशा तीन सेटांनी हारली. हे हारीक लागून स्वियातेकाचें विम्बल्डनांतलें आव्हान सोंपलें.
28 वर्सां पिरायेचे स्वितालिनान ऑक्टोबरांत जलयेक जल्म दिल्लो. ते उपरांत तिणें खेळांतल्यान ब्रेक घेतिल्लो. अंदूं एप्रीलांत डब्ल्युटीए टुरा वरवीं तिणें टॅनिसांत पुनरागमन केल्लें. फ्रॅंच ओपनाचे क्वॉर्टरफायनलींत सुवात मेळयल्या उपरांत तिका विम्बल्डनांत वायल्ड कार्ड वरवीं प्रवेश दिल्लो.
विम्बल्डन सर्तीचे सुरवातीक आपूण संवसारीक क्रमवारींत पयले सुवातेर आशिल्ले खेळगडयेक हारोवन सेमी फायनलींत पावतली अशें आपल्याक कोणें सांगिल्लें जाल्यार तिका आपूण अति उत्साही म्हणटली आशिल्लें अशें मॅच सोंपल्या उपरांत पत्रकारां कडेन उलतना स्वितालिनान म्हणलें.
स्वियातेकान फ्रॅंच ओपन ग्रॅण्ड स्लॅम जिखिल्ली. पूण, विम्बल्डनांत स्वियातेक पयले खेपे क्वॉर्टरफायनलींत पाविल्ली. मजगतीं, स्वितोलिना सेमी फायनलींत मार्केटा वांद्रोसोवा आड खेळटली. वांद्रोसोवान चवथ्या सिडाचे जेसिका पेगुला आडचे क्वॉर्टरफायनलींतल्या निमाण्या सेटांत सेगीत पांच गेमी जिखून सेमी फायनलींत सुवात मेळयल्या. तिणें 6-4, 2-6 आनी 6-4 अशा तीन सेटांनी जैत जोडलें.
झेक प्रजासत्ताकाची वांद्रोसोवा निमाण्या सेटांत 1-4 अशी फाटीं पडिल्ली. पूण, ते उपरांत तिणें सेगीत पांच सेट जिखून निमाण्या चारांनी आपली सुवात निश्चीत केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
