भांगरभूंय | प्रतिनिधी
पोलंडाची इगा स्वियातेक हिणें विम्बल्डन सर्तींत बायलांच्या एकोड्या गटांतलें वस्तादपण जोडून इतिहास घडयलो. आठवे सुवाते वयले स्वियातेक हिणें सेंटर कोर्टांत जाल्ले फायनलींत अमेरिकेचे अमाण्डा अनिसिमोवा हिका 6-0 आनी 6-0 अशा सरळ सेटांनी हारोवन आपलो पयलो विम्बल्डन आनी वट्ट सवे ग्रॅण्ड स्लॅम किताब जिखलो.
24 वर्सां पिरायेचे स्वियातेकान जबरदस्त प्रदर्शन करतना अनिमिसोवाचें आव्हान फकत 57 मिनटांनी सोंपयलें. विम्बल्डनाच्या इतिहासांत 1911 उपरांत पयले खेपे बायलांच्या गटांतले फायनलीचो निकाल 6-0 आनी 6-0 असो लागलो. प्रतिस्पर्धी खेळगडयेक एक लेगीत गेम जिखपाक जमूंक ना.
तशेंच 2016चे सर्ती उपरांत सावन दर वर्सा विम्बल्डनांत नवीन चॅम्पियन पळोवपाक मेळ्ळ्या. 2017त गर्बाइन मुगिरुझान, 2018त एंजेलीक कर्बरान, 2019त सिमोना हालेपान, 2021त एेश बार्टीन, 2022त एलेना रिबाकिनान, 2023त मार्केटा वोंड्रोसोवान आनी 2024त बारबोरा क्रेजिकोव्हान वस्तादपण जोडिल्लें आनी अंदूं लेगीत नवीन चॅम्पियन टॅनीस मोग्यांक पळोवपाक मेळ्ळी.
स्वियातेकान अंदूंचे विम्बल्डनांत फकत एकूच सेट व्हगडायला. हाचे वयल्यान सर्तीतलो तिचो शेक स्पश्ट जाणावता. स्वियातेकान फ्रॅंच ओपन 2020, 2022, 2023 आनी 2024त जिखल्या. तशेंच 2022त अमेरिकन ओपन आपल्या नांवार केल्ली.
स्वियातेकाचें विम्बल्डनांतलें हें सर्वोत्कृश्ट प्रदर्शन आसा. हाचे पयलीं म्हणल्यार 2023त ती क्वॉर्टरफायनलींत पाविल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
