भांगरभूंय | प्रतिनिधी
सांगूनय १० पंचायतींनी ग्रामसभा घेवंक नात
वाळपय, प्रतिनिधी: ‘इको- सेन्सिटिव्ह झोनां’त सत्तरी म्हालांतल्या जायत्या गांवांचो आसपाव जाला. हाका सत्तरी म्हालांत विरोध जालो. हे विशींचो निमाणो मसुदो तयार करतले. ताका हरकती दाखल करपा खातीर दोन म्हयन्यांचो वेळ दिल्लो. १२ सप्टेंबर निमाणो दीस. सत्तरी म्हालांतल्या पंचायतींनी हे विशीं आपलें म्हणणें मांडपाची सुचवणी पंचायत खात्याक दिल्ली. मात निमाण्या दिसा फकत केरी आनी पिसुर्ले ह्या दोन पंचायतींनीच ह्या ‘झोना’क विरोध केला. हेर धा पंचायतींनी आजूनय आपलें म्हणणें सादर करूंक ना.
केंद्र सरकारच्या हवामान बदल खात्यान सत्तरींतल्या सुमार ९०% गांवांचो ह्या झोन वाठारांत आसपाव केला. झोनांत आसपाव जाता त्या वाठारांचे उदरगतीक ब्रेक लागतलो. देखून हाका विरोध जाता.
मजगतीं, परत अशे तरेचो मसुदो जाहीर करून हे विशीं ज्या गांवांचो आसपाव केला त्या गांवच्या लोकांनी आनी थळाव्या पंचायतींनी आपलें म्हणणें मांडपा खातीर तांकां दोन म्हयन्यांचो वेळ दिल्लो. १२ सप्टेंबर मेरेन दरेके पंचायतीन खास ग्रामसभा आपोवन तातूंत मसुद्याचेर आपलें मत मांडचें, अशी सुचोवणी पंचायत संचालकान केल्ली. मात बारा पंचायतीं मदल्या फकत केरी आनी पिसुर्ले ह्या दोनूय पंचायतीन हाका विरोध केला. हे विशींचो प्रस्ताव तांणी गोंय प्रदूशण नियंत्रण मंडळ आनी संबंदीत खात्याक केला. वाळपय गटविकास अधिकार्याक ताच्यो प्रती सादर केल्यात.
पर्यें मतदार संघांतल्या केरी आनी पिसुर्ले ह्या दोनूच पंचायतींनी खास ग्रामसभा घेतल्यो. लोकांचे म्हणणें आयकून घेतलें. दोनूय कडेन विरोध जालो. हो झोन जाहीर जाल्यार पिसुर्ले पंचायत वाठारांत आशिल्ल्यो खणी सुरू करपाक बंदी घालतले. केरी पंचायत वाठारांत आशिल्ल्यान जायत्या गांवांनी उदरगतीचे प्रकल्प चालीक लावप कठीण जातलें, अशें लोकांनी सांगलें. देखून पंचायतींनी विरोधाचो प्रस्ताव पंचायत खात्याक दिला. हेर कडेन आजूनय ग्रामसभा घेवंक ना, अशी म्हायती मुखार आयल्या.
मजगतीं, हे विशीं सत्तरी म्हालाचे गटविकास अधिकारी सूर्याजीराव राणे हांचे कडेन संपर्क केलो तेन्ना तांणी, पंचायतीन दिल्ले निर्देश पाळपा विशीं गटविकास कार्यालयांतल्यान दरेके पंचायतीक पत्र धाडिल्लें, अशें सांगलें. प्रत्यक्षांत पंचायतीच्या सचिवा कडेन संपर्क करून, हे विशीं विशेश बसका घेवन मत मांडपाच्यो सुचवण्यो केल्ल्यो. मात पंचायतींनी ग्रामसभा घेवंक नात, अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
