भांगरभूंय | प्रतिनिधी
केरी- सत्तरीः गोंय शालांत मंडळा वतीन यत्त इकरावी खातीर नव्यान बरयिल्ल्या इतिहास विशयाच्या पुस्तकाचें प्रकाशन मुख्यमंत्री डॉ. प्रमोद सावंत हांचे हस्तुकीं जालें. हो सुवाळो पर्वरेच्या मंत्रालय सभाघरांत जाली.
ह्या सुवाळ्याक मुख्यमंत्र्यां वांगडा शिक्षण सचीव प्रसाद लोलयेंकार, शिक्षण संचालक शैलेश झिंगडे, गोंय शालांत मंडळाचे अध्यक्ष भगीरथ शेट्ये आनी उच्च माध्यमीक विद्यालयाच्या इतिहास विशयाच्या अभ्यास मंडळाचे समन्वयक प्रा. दत्ता परब हाजीर आशिल्ले.
इकरावेच्या नव्या पुस्तकांत भारतीय इतिहासाचेर आनी गोंयच्या इतिहासाचेर योग्य तरेन उजवाड घातला. पुर्तुगीजपूर्व काळा सावन गोंया विशींचो इतिहास पुस्तक रुपान विद्यार्थ्यां खातीर पयलेच खेपे उपलब्ध केला. गोंयचो मूळ इतिहास कितें आसा, तातूंत नव्या राजवटींत कांय विशिश्ट बदल केले ताचेरूय उजवाड घातला.
ह्या पुस्तकांत पुर्तुगीज राजवटी आड कुंकळ्ळीच्या गांवकारांनी केल्ल्या बंडाच्या इतिहासाची म्हायती दिल्या. गांवच्या लोकांनी वसणूकवादा आड उबारिल्लें हें भारतांतलें पयलें बंड आसा. ह्या गोंयांतल्या बंडाचेर गोंयच्या इतिहासाच्या पुस्तकांत खंयच उल्लेख नाशिल्लो. ह्या पुस्तकांत कुंकळ्ळीच्या लोकांचें पुर्तुगेजा आड केल्ल्या बंडाचें कारण, घटनाक्रम आनी त्या बंडाचे परिणाम वेवस्थीत तरेन विद्यार्थ्यांक सहज कळपाक शकतले अशा उतरांनी मांडल्यात.
इतिहास पुस्तकांत संवसारीक पुर्विल्ली संस्कृती, भारतीय सिंधू- सरस्वती संस्कृती, वैदीक आनी त्या वैदीक काळा उपरांतची संस्कृती, जैन बौद्द धर्म, भारतांतलें दुसरें शबरीकरण, मौर्य, गुप्ता राजवटी, दक्षीण भारतांतल्यो राजवटी, दिल्लीची सुल्तानी राजवट आनी गोंयच्या इतिहासाचेर अभ्यास मंडळाचे मुखेली गोंय विद्यापिठाची इतिहास प्राध्यापक डॉ. सीमा रिसबूड, डॉ. अल्विता डिसोझा, मेघना कापडी, मंगेश वरेरकर, रामचंद्र (सुदन) बर्वे आनी बालाजी शेणवी हांणी इतिहास मंडळाच्या आदारान ह्या पुस्तकाचें लेखन केलां.
गोंय विद्यापिठाचे इतिहासाचे सहप्राध्यापक विनोद काणकोणकार हांणी ह्या पुस्तकाचें परिक्षण केलें. शेट पब्लिशर, मुंबय हांणी हें पुस्तक छापलां जाल्यार गोंय माध्यमीक आनी उच्च माध्यमीक शिक्षण मंडळ पर्वरी वतीन ताचें प्रकाशन केलां.
कुंकळ्ळीच्या बंडाच्या इतिहासाचे लेखक
ह्या पुस्तकांतलो इतिहास कुंकळ्ळीच्या बंडा वयलें लेखन गोंय माध्यमीक आनी उच्च माध्यमीक शिक्षण मंडळाच्या इतिहास विशयांतल्या उच्च माध्यमीक अभ्यास मंडळाचे समन्वयक प्रा. दत्ता परब, प्रा. सुरेखा नायक, प्रा. आवेलीन फर्नांडीस, प्रा. तिएफ सिल्वेरा, प्रा. वल्लभ केळकार, डॉ. वर्षा कामत हांचे वांगडा डॉ. सुशिला मेंडीस, बोनिता रॉड्रीग्स, गणेश गावडे, ज्योती चिपळूणकार आनी विजयकुमार कोप्रेदेसाय हांणी केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
