भांगरभूंय | प्रतिनिधी
आयज मुरगांव मामलेदारान आपयल्या बसका
भांगरभूंय । प्रतिनिधी
वास्कोः दाबोळी- बोगमाळो चौका पासून कांय अंतराचेर खणटना शुक्रारा फुटिल्ले इंधन पायपलायनीची दुरुस्ती करपाचें काम हातांत घेतलां. तें काम बेगिनात बेगीन पुराय जावचे खातीर कंपनीन यत्न चलयल्यात. अशी घडणूक परतून जावची न्हय हे खातीर सरकारी यंत्रणेन झुआरी ऑयल टँकींग कंपनी आनी कंत्राट कंपनी मदीं समन्वय हाडपा खातीर यत्न करपाची गरज आसा, अशें थळाव्या लोकांनी म्हणलां.
एमईएस चौक ते दाबोळी- बोगमाळो चौक हांचे मदीं उड्डाण पूल बांदतात. ताचें काम चालू आसा. कांय कडेन सोयी प्रमाण खांबे उबारतात. तशेंच रस्त्याचे कुशीक युटिलिटी गटार बांदपाचें काम सध्या नेटान चल्लां. हें गटार बांदपाचें काम आनी रस्तो रुंदीकरणाचें काम एकाच वेळार चालू आशिल्ल्यान व्हड अर्थ मुव्हर यंत्रान खणप चालू आसा. शुक्रारा खणटना एके कडेन जमनी पोंदा आशिल्ली इंधन पायपलायन फुटली. त्या वेळार ती पायपलायन रिती आशिल्ल्यान कसलोच अनर्थ जावंक ना, पूण कांय वेळ त्या वाठारांत भिरांत पातळ्ळी.
हे संबंदांत मुरगांवचे मामलेदार प्रविणजय पंडीत हांणी झुआरी इंडियन ऑयल टँकींग आनी कंत्राट कंपनीच्या अधिकाऱ्यांची सोमारा एक बसका आपयल्या. ते बसकेंत अश्यो घडणुको घडच्यो न्हय हे खातीर कसली खबरदारी घेवची हे संबंदांत चर्चा करतले. झुआरी इंडियन ऑयल टँकींग हांणी फुटिल्ली पायपलायन दुरुस्त करपाचें काम सुरू केलां. ते खातीर संबंदीत कंपनीच्या कंत्राटदाराचे कामगार थंय कामाक लायल्यात. हे दुरुस्तीक चार दीस तरी लागतले, असो अदमास आसा. ही इंधन पायपलायन दुरुस्त केले उपरांत तिची चांचणी घेतले उपरांतूच तातूंतल्यान इंधन सोडटले. मजगतीं, हे दुरुस्तीचो खर्च कोण करतलो हें अजून स्पश्ट जावंक ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
