इंधन, गॅसीच्या पर्यायांचेर भर दियात
भांगरभूंय | प्रतिनिधी
- प्रधानमंत्री नरेंद्र मोदी हांचो राज्यांक सल्लो
- इंधन संकश्टाचे फाटभुंयेर व्हिडियो कॉन्फरन्सींग बसका
- लोकांचो विस्वास तिगोवन दवरात म्हूण उलो
- भांगरभूंय | खबरां मेज
- नवी दिल्ली : जैवइंधन, सौर उर्जा, गोबरधन उपक्रम, विजेचेर चलपी वाहनां आनी पाईप नॅचरल गॅस जोडणी वाडोवपा सारक्या पर्यायी उर्जा स्त्रोतांक चालना दिवपाच्या यत्नांक गती दिवची अशें आवाहन प्रधानमंत्री नरेंद्र मोदी हांणी राज्यांक केलें. तशेंच राज्यांच्या सक्रीय सहकार्यान तेल आनी सैमीक वायूचो देशांतर्गत सोद वाडोवपाचें म्हत्व तांणी स्पश्ट केलें.
- अस्तंत आशियांत हालींच घडिल्ल्या घडणुकांक लागून निर्माण जाल्ली परिस्थिती आनी ताचो भारताचेर जावपी संभाव्य परिणाम हे फाटभुंयेर प्रधानमंत्री नरेंद्र मोदी हांणी काल राज्यांचे मुख्यमंत्री आनी नायब राज्यपालां वांगडा व्हिडियो कॉन्फरन्सींग वरवीं बसका घेतली.
- लोकांचो विस्वास तिगोवन दवरात. गरजेच्या वस्तूंच्या उपलब्धते विशीं आस्वासन दिल्यार नागरिकां मदीं गरजे भायर भिरांत निर्माण जावची ना, अशें प्रधानमंत्री नरेंद्र मोदी हांणी सगल्या राज्यांक सांगलें. भारताची अर्थीक आनी पुरवण यंत्रणा घटमूट करपा खातीर हालींच्या वर्सांनी केल्ले यत्न सद्या फायद्याचे थारत आसात. बेगोबेग प्रतिसाद आनी दीर्घकालीन तयारीचेर समांतर लक्ष केंद्रीत करात, अशें आवाहन प्रधानमंत्र्यांनी केलें.
- अस्तंत आशियांतल्या सद्याच्या परिस्थितीचो उल्लेख करून प्रधानमंत्री हांणी सांगलें की, भारताक अशे तरेच्या संवसारीक उलथापालथीक तोंड दिवपाचो आदलो अणभव आसा. परिस्थिती गतीशील आसा, ताका लागून सातत्यान देखरेख आनी अनुकूल रणनिती गरजेची आसा अशें प्रधानमंत्र्यांनी स्पश्ट केलें. दर दिसा परिस्थितीचो नियाळ घेवन वेळार निर्णय घेवपी आंतरमंत्रालयीन गट 3 मार्च सावन कार्यरत आसा अशें तांणी सांगलें. अर्थीक आनी वेपारी स्थिरताय राखप, उर्जा सुरक्षा निश्चीत करप, नागरिकांच्या हिताची राखण करप आनी उद्देग आनी पुरवण सांखळी घटमूट करप हें सरकाराचें प्राधान्य आसा अशें तांणी सांगलें.
- राज्यांनी पुरवण सांखळी सुरळीत चलोवपाची जतनाय घेवची आनी साठेबाजी आनी नफेखोरी हांचे आड खर पावलां उबारचीं अशें आवाहन प्रधानमंत्र्यांनी केलें. तशेंच शेतकी क्षेत्रांत फुडारा खातीर नियोजन करपाची गरज आसा, खास करून खतांची सांठवण आनी वितरणाचेर नदर दवरप, जाका लागून शेतकारांक येता त्या खरीप हंगामांत अडचणींक तोंड दिवचें पडचें ना, अशेंय तांणी सांगलें.
- परिस्थिती स्थीर
- उरतली : मुख्यमंत्र्यांक विस्वास
- पेत्रोल, डिझेल आनी एलपीजीची फावो ती उपलब्धता आनी गरजेच्या वस्तूंची अखंडीत पुरवण जावची हे खातीर सातत्यान देखरेख यंत्रणा आशिल्ल्यान परिस्थिती स्थीर उरतली, असो विस्वास राज्यांतल्या मुख्यमंत्र्यांनी उक्तायलो. संवसारीक अनिश्चिततायेच्या काळांत नागरिकांक म्हत्वाचो दिलासा मेळटलो अशें सांगून इंधनाचेर अबकारी कर उणो करपाच्या निर्णयाक तांणी येवकार दिलो. राज्यां आनी केंद्रशासीत प्रदेशांक वेवसायीक एलपीजी वाटप 50 टक्क्यां वयल्यान 70 टक्क्यां मेरेन वाडोवपाच्या निर्णयाक मुख्यमंत्र्यांनी येवकार दिलो. तांणी बदलपी परिस्थितीचें प्रभावीपणान वेवस्थापन करपा खातीर आनी नागरिकांच्या हिताची राखण करपा खातीर केंद्रा कडेन लागींच्या समन्वयान काम करपाची वचनबद्धता उक्तायली.
- वेंचणुको आशिल्ल्या
- राज्यां खातीर वेगळी बसका
- गृहमंत्री अमीत शाह आनी संरक्षण मंत्री राजनाथ सिंह, आंध्र प्रदेशाचे मुख्यमंत्री चंद्राबाबू नायडू, छत्तीसगडचे विष्णू देव साय, तेलंगणाचे मुख्यमंत्री रेवंत रेड्डी, उत्तर प्रदेशाचे मुख्यमंत्री योगी आदित्यनाथ, जम्मू-काश्मीरचे मुख्यमंत्री ओमर अब्दुल्ला, पंजाबाचे भगवंत मान, मध्य प्रदेशाचे मुख्यमंत्री मोहन यादव, झारखंडाचे मुख्यमंत्री हेमंत सोरेन, उत्तराखंडाचे पुष्कर सिंग धामी, गुजराताचे मुख्यमंत्री भूपेंद्र पटेल, आनी महाराष्ट्राचे मुख्यमंत्री देवेंद्र फडणवीस हे प्रधानमंत्री मोदी हांचे वांगडा व्हर्च्युअल बसकेंत हाजीर आसात.
- पोट वेंचणुको आशिल्ल्या राज्यांचें मुख्यमंत्री हे बसकेंत वांटेकार जावंक ना. वेंचणूक जावपी राज्यांच्या मुखेल सचिवांची वेगळी बसका जातली, जी मंत्रीमंडळ सचिवालया वरवीं जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
