इंधन अनुदान दियात, मागीर ‘म्हजी बस’ येवजणेचेर उलयातः ताम्हणकार

भांगरभूंय | प्रतिनिधी

अखील गोंय बस धनी संघटनेची येरादारी संचालनालया कडेन मागणी

भांगरभूंय । प्रतिनिधी
पणजीः ‘म्हजी बस’ येवजण सुरू करचे पयली, इंधन अनुदानाचे देणे जे उरला ते सरकारान पयली दिवचे आनी उपरांतच हे विशीं चर्चा सुरू करची. गोंयभर बस धनयांचो बसका चल्ल्यात आनी तांचेनी हे येवजणेक विरोध करत इंधन अनुदान दिवपाचे मागणेचेर नेट धरलां, अशें अखिल गोंय बस धनी संघटनेचे अध्यक्ष सुदीप ताम्हणकार हांणी सांगलें. अखिल गोंय बस धनी संघटनेच्या वांगड्या बरोबर येरादारी खात्याचे तशेंच कदंब महामंडळाचे अधिकारी आशिल्ले.
बसके उपरांत उलयतना ताम्हणकार हांणी सांगलें, म्हजी बस येवजण 2025 मसुदो समजावन सांगपाक कदंब महामंडळाचे वेवस्थापकी संचालकान सुरू करतच आमी तांका सांगलें, आमी हो मसुदो खोलायेन वाचला आनी सगळे तपशील आमकां खबर आसा.
आमी हाचेर कसलीच चर्चा करपाचे ना अशें सांगून जी इंधन अनुदान सरकारा कडल्यान 2018 ते मार्च 2020 मेरेन उरलां ते सरकारान दिवचे आनी उपरांत फुडले उलोवप करचे. बस धनयांनी गोंयभर आपल्यो बसका घेवपाक सुरवात केल्या. फोंडें, वास्को बसका जाल्यात उपरांत मडगांव कुडचड्यां बसका जातल्यो. हे बसकेत धनयांनी म्हजी बस येवजणेक विरोध केलां, अशी म्हायती ताम्हणकार हांणी दिली.
म्हजी बस सुधारीत येवजणेत पयलींचे इंधन अनुदान आसा तशेंच 30 रुपया दर किमी थारायलां. तशेंच विमाचो लाव जो पयली 20 हजार आसलो तो आतां 30 हजार मेरेन वाडयलां. पयली बस घेवपाक 2 लाख अनुदान दिताले आता 10 लाख दितात. तशेंच भुरग्यां खातीर सरकारी नोकरे सयत तांची लग्ना लावन दितात अशें आश्वासन दिलां. हे गजालींचेर आमका विश्वास ना देखून आमी सांगलां पयली पयशे दियात उपरांत फुडली चर्चा करात, अशें ताम्हणकार हांणी म्हणलें.
2023त जेन्ना म्हजी बस येवजण सुरू केल्ली तेन्ना हांचेनी बस धनयांक विश्वासात घेवंक ना. फकत 57 बस धनयांक हे पयशे दितात. दोन वर्सांत 11.66 कोटी सरकारान हे येवजणेचेर मोडले. तातुंतल्या निलेश काब्राल हांच्या चार बसीं खातीर 1.7 कोटी फकत तांकां दिले. देखून पायलट तत्वा सारखे फटींगपणाचे धंदे आमकां नाका अशें सांगला, असो आरोप ताम्हणकार हांणी केलो.
इंधन अनुदान येवजण ही अधिसुचित सासणा खातीरची येवजण आसा. मुख्यमंत्री आनी येरादारी मंत्र्याचे लक्ष फकत चेकपोस्टाचेर आसा. देखून आमी परत एक फावट तांकां सांगलां आमकां चेक पोस्टार वचपाक लावं नाकात, कितें देणें आसा ते दियात आनी उपरांत ‘म्हजी बस’ येवजणेचेर विचार करुया, अशी सुचोवणी ताम्हणकार हांणी दिल्या.