इंडोनेशियेंतली तिडक

भांगरभूंय | प्रतिनिधी

राजकी फुडाऱ्यांनी लोकांची सेवा करची. पगार घेनासतना निसुवार्थीपणान काम करचें. धन जोडपा खातीर राजकारणाचो वापर जावचो न्हय, अशें महात्मा गांधीजीन एकदां म्हणिल्लें. मात भोवतेक राजकी फुडारी पांच वर्सां उपरांत पगार, भत्ते, सवलती भायर कोटींचे कोटी सहज जोडटात. मंत्र्यांच्या बी बाबतींत घडये हो आंकडो कल्पने भायलो आसतलो. पगार, भत्ते वाडोवपाचो विशय येता, तेन्ना एकमेकांचेर तुटून पडपी फुडारी एकवटान तें विधेयक मंजूर करतात. मागीर तांंचे विरोधक फक्त तोंडाचीं बातां मारतात वा हुं की चूं करिनासतना ओग्गी रावतात. मात इंडोनेशियाक फाटलें सप्तकभर वेगळेंच चल्लां. खासदारांच्या भत्तो वाडीच्या आड थंय विद्यार्थ्यांची हिंसक निदर्शनां चल्ल्यांत. तातूंत पांच जाणांक मरण आयलां. आतां हेर नागरिकांनीय कायदो हातांत घेतला. निशेध आंदोलनाचें निमित्त जालें, खासदारांचें घरभाडें वाडोवपाचें विधेयक. म्हयन्यांक 2 लाख 70 हजार भारतीय रुपया इतली वाड. हाचे भायर पगार, भत्ते, सवलती आसातूच. ह्या नियोजीत विधेयकाची खबर कानार पडली तेन्ना इंडोनेशियेंतल्या विद्यार्थ्यांनी आंदोलन सुरू केलें. खासदारांच्या घरांचेर, मालमत्तांचेर, संसद भवनाचेरुय हल्लो जालो. सगलेच लोकप्रतिनिधी सरकारी गाडये बदला भाड्याची गाडी घेेवन भोवपाक लागले. कारण आंदोलक वळखत म्हूण भंय. फाटल्या कांय दशकांतलें इंडोनेशियांतलें हें सगल्यांत हिंसक आंदोलन. काल आयतारा सांजवेळार खासदारांच्यो कांय सवलती, विशेशाधिकार रद्द करपाक राजकी पक्षांनी तयारी दाखयल्या. तांकां कामा निमतान (?) विदेश भोंवडेरुय वचपाक मेळचें ना. राष्ट्रपती प्रबोवो सुबियांतो हांणी पत्रकार परिशदेंत हिंसाचाराच्या कांय कृतींनी आतंकवाद आनी देशद्रोह हांचे संकेत दिसतात, अशें वक्तव्य केलां. ताचेर विद्यार्थी संघटना तिडकल्यात. जागतीक हक्क संघटनेनूय ह्या उतरांचो निशेध केला. ह्या आंदोलनाचो शेवट जातलो काय तें आनीक पेट्टलें हें कळटलेंच. नवें सरकार सत्तेर येवन वर्स जालें, मात तांकां खंयच्याच राजकी पक्षान तसो विरोध करूंक नाशिल्लो. आतां हें आंदोलन सुरू जालां, तें मात खूबच खर आसा.
विद्यार्थी संघटनांनी केल्लीं आंदोलन संवसारभरांत यशस्वी थारल्यांत. गोंयांत पसून कॅपिटेशन फी, बशीची अर्दी तिकेट हीं आंदोलनां विद्यार्थ्यांनी केल्लीं. सध्या मात तसले विद्यार्थी चुकूनच दिसतात. काळा वांगडां सगलेंच बदलता म्हणटात तें खरें. इंडोनेशियांत मंत्र्यांक सादारण 3 ते 5 लाख रुपया पगार मेळटा. सवलती, भत्ते वेगळे. मानूय मेळटा तो वेगळो. हेर देशांनी आसा तशीच तिडक थंय राजकी फुडाऱ्यां विशीं आसा. फाटल्या सोमारा सावन हें आंदोलन पेटलां. सवलतीं फाटीं घेतल्यो वा त्यो उण्यो केल्यो म्हूण उपकारचें ना. रस्त्यार तिडक उक्ती जाल्या, तिचे फावट्यान जायतीं कारणां आसात. समाजांत खोल मेरेन खोल मेरेन रुजिल्ल्यो समस्या सोडोवपाचो यत्न सरकारान केले बगर हो राग शांत जावचो ना, अशें विद्यार्थी म्हणटात. समाजांतली विशम अर्थीक रचणूक आनी राजकी भाटकारशाय जो मेरेन सोंपना, तो मेरेन ही अस्वस्थताय तशीच उरतली, अशेंय ते सांगतात. हाचो अर्थ घरा घरांत मातयेच्योच चुली. भारतांतूय विद्यार्थी निशेध, धरणें, आंदोलना करतात. पूण आतां ते विवीध गटांनी विभागल्यात. उजवे, दावे. दोगांयचेरुय राजकी वरदहस्त आशिल्ल्याचें जाणवता. म्हणटकच एकवटान आंदोलन जातलें हाची खात्री ना. मात इंडोनेशियेंतले विद्यार्थी मतभेद कुशीक दवरून एकवटल्या आनी सरकारान घेतिल्लो ‘यु टर्न’ पळयल्यार तांच्या आंदोलनाक येश मेळटना दिसता.
हें फक्त इंडोनेशिये पुरतें म्हूण सोडून दिवंक जायना. ताचे परिणाम खंयच्याय देशांत जावं येतात. कारण, सगलेच कडेन असलेच प्रकार चलतात. लोकप्रतिनिधी म्हणल्यार राजा, महाराजा जाल्यात, असें लोक उलयतात तें फट न्हय.