भांगरभूंय | प्रतिनिधी
युरी आलेमांवः धर्माच्या आदारान मतांची विभागणी करपाचो भाजपाचो यत्न दक्षिणेंत लोकांनी हाणून पाडलो
भांगरभूंय । प्रतिनिधी
पणजी : धर्माच्या आदारान मतांची विभागणी करून जैत मेळोवपाचो भाजपाचो यत्न दक्षीण गोंयच्या लोकांनी हाणून पाडलो, अशें काँग्रेस विधीमंडळ फुडारी युरी आलेमांव हांणी सांगलें. इंडी आघाडीचें अस्तित्व कायम उरतलें आनी येता ते विधानसभा वेंचणुकेंत आघाडीक 30 सुवातो मेळटल्यो, असो विस्वास युरी आलेमांव हांणी उक्तायला.
लोकसभा वेंचणूक निकाला उपरांत गोंयच्या इंडी आघाडी फुडाऱ्यांची पणजे पत्रकार परिशद जाली. काँग्रेस विधीमंडळ फुडारी युरी आलेमांव, काँग्रेस प्रदेश अध्यक्ष अमीत पाटकार, गोवा फॉरवर्ड अध्यक्ष विजय सरदेसाय, आपाचे फुडारी अमीत पालेकार, राष्ट्रवादी शरद पवार पक्षाचे जुझे फिलीप डिसोझा, शिवसेना उद्धव ठाकरे गटाचे फुडारी जितेश कामत, नवनिर्वाचीत खासदार विरियातो फर्नांडीस, आमदार कार्लोस फेरेरा, एल्टन डिकोस्टा आनी हेर मानेस्त हाजीर आशिल्ले.
‘अब की बार चारसो पार’ ही भाजपाची घोशणा पोको फार थारल्या. देशांत एनडीएचें सरकार घडये जायत, तरी लेगीत ही भाजपाची नैतीक हार आसा. नरेंद्र मोदी हांचे सयत भाजपा वयलो लोकांचो विस्वास आनीक देंवपाक लागला. भाजपान सत्तेचो गैरवापर करून प्रचार केलो, तरी लेगीत दक्षीण गोंय जिखपाक भाजपाक अपेस आयलें, अशें युरी आलेमांव हांणी सांगलें. उत्तर गोंयांत जाल्ले हारीचें आमी विश्लेशण करतले, अशेंय तांणी सांगलें.
दामबाब मडगावकारां सयत आसा : विजय सरदेसाय
मडगांवां देवा कडेन उलोवपी लोक आसात. दामबाब मात मडगावकारां वांगडा आसा, हे वेंचणुकेत सिद्द जालें, अशें विजय सरदेसाय हांणी म्हणलें. आपसांत मतभेद आसतना लेगीत विरोधी पक्ष एकठांय आयले. हाका लागून दक्षीण गोंयांत इंडी आघाडीचो उमेदवार जैतिवंत थारलो, अशें विजय सरदेसाय हांणी सांगलें.
लोकशाय वाटोवपाक एकठांय येवपाची गरज : आप
इंडी आघाडीक गोंयांतूच न्हय जाल्यार पुराय देशांत येस मेळ्ळां. लोकशाय वाटावपा खातीर विरोधकांनी एकठांय येवपाची गरज आसा, अशें आपाचे निमंत्रक अमीत पालेकार हांणी म्हणलें.
मुरगांव म्हालांत मंत्री तशेंच भाजपाचे सगळे आमदार आसतना लेगीत तांकां फावो ती आघाडी मेळ्ळी ना. भाजपा सरकाराची ही हार आसा, अशें राष्ट्रवादी शरद पवार गटाचे फुडारी जुझे फिलीप डिसोझा हांणी म्हणलें.
एकाधिकारशाही आनी फूट घालपाचें राजकारण हे फुडें चलचें ना, हें निकालांतल्यान सिद्द जाल्याचें शिवसेनेचे जितेश कामत हांणी सांगलें.
बाणावले काँग्रेसीचो आपाक तेंको
बाणावली जिल्हो पंचायत वेंचणुकेंत काँग्रेस पक्ष आपाच्या उमेदवाराक तेंको दितलो, अशें प्रदेश अध्यक्ष अमीत पाटकार हांणी स्पश्ट केलें. इंडी आघाडीचो एकूच उमेदवार आसतलो, अशें संकेत फुडाऱ्यांनी पत्रकार परिशदेंत दिले. बाणावलीची सुवात पयली आपान जिखिल्ली. आप निश्चितपणान बाणावली उमेदवार दवरतली, अशें आपाचे निमंत्रक अमीत पालेकार हांणी सांगलें.
गोंयचे प्रस्न संसदेंत मांडटलों : विरियातो फर्नांडीस
आपल्याक मेळिल्लें जैत हें जनतेचें जैत आसा. संसदेंत आपूण दक्षीण गोंयचे न्हय जाल्यार पुराय गोंयचे प्रस्न मांडटलों. दाबोळी विमानतळ, कोळशाची येरादारी, म्हादयचो प्रस्न, पासपोर्ट अशें तरेकवार प्रस्न आसात. हे प्रस्न सुटावे करपाक सरकाराक अपेस आयलां. सगळे प्रस्न आपूण संसदेंत मांडटलों, अशें विरियातो फर्नांडीस हांणी सांगलें. उत्तर गोंयचे काँग्रेस उमेदवार अॅड. रमाकांत खलप हारिल्ले खातीर आपणाक दुख्ख जाता, अशेंय तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
