भांगरभूंय | प्रतिनिधी
मडगांव : राज्यांत ‘इंडिया एनर्जी वीक’ जावपाचो आसा. तातूंत वांटेकार जावप्यांक बेतूल व्हरपा हाडपाचें काम थळाव्या टॅक्सीकारांक मेळचें. ह्यान फुडें राज्यांत जावपी खंयच्याय सरकारी वा हेर इव्हेंट, वेंचणुकां वेळार आनी उपक्रमां खातीर गरजेच्यो टॅक्सी थळाव्यां कडल्यान घेवच्यो. हाचो आसपाव नव्या धोरणांतूय जावचो, अशी मागणी आमदार व्हेंझी व्हिएगस हांणी केली.
बाणावले थळावे टॅक्सी चालक आनी धनी असोसिएशन हांचे वांगडा बसका जाली. हे बसके उपरांत आमदार व्हेंझी हांणी सांगलें, टॅक्सीचालकां खातीर धोरण 10 सप्टेंबर मेरेन थारपाचें आशिल्लें, मात मुख्यमंत्र्यान आजूनय धोरण थारावंक ना. ते खातीर आनीक आठ ते धा दीस लागतले, ताचो मसुदो आजूनय सुरू आशिल्ल्याचें सांगलें. राज्यांत जावपी इंडिया एनर्जी वीका खातीरची तयारी सुरु जाल्या. हॉटेलांची बुकींगूय जाल्या. ओएनजीसीचे खुबशे मानेस्त येतले. इंडिया एनर्जी वीका खातीर बाणावले, मडगांव आनी हेर वाठारांतल्यान वांटेकार जावप्यांक व्हरपा खातीर टॅक्सी येरादारीचें काम दुसर्या कोणाक तरी दिलां. तातूंत थळाव्या टॅक्सीचालकांक आसपावन घेवंक ना. हाका लागून इव्हेंटा खातीर ज्यो गाडयो लागतात त्यो थळाव्या टॅक्सीकारां कडल्यान घेवच्यो, हे खातीर निवेदन दितले आनी हाचो आसपाक टॅक्सी धोरणांतूय जावचो, अशी मागणी व्हेंझी हांणी केली.
विमानतळा वेल्यान प्रवाशांक हॉटेलांत सोडले उपरांत ह्या वाठारांत भोंवपा खातीर थळाव्या टॅक्सींचो वापर करचो. हे विशीं उलोवप करून समजायतले, अशें व्हेंझी हांणी स्पश्ट केलें.
मजगतीं, राज्यांत टॅक्सी अॅपा खातीर केल्लो मसुदो आजूनय मंजूर जावंक ना. हाका लागून आतां टॅक्सी धोरण तयार करतात. टॅक्सीकारांनी टॅक्सी अॅप गरजेचें नाशिल्ल्याचें स्पश्ट केलां. फकत पयशे दिवपा-घेवपा खातीर आनी सुरक्षितताये खातीर डिजिटल प्लॅटफॉर्म आसचो. टॅक्सी अॅप ऍग्रीग्रेटर नोंदणेची गरज ना. तो आसल्यार कोणूय नोंदणी करतलो आनी ताचो परिणाम थळाव्या टॅक्सीकारांचेर जातलो, अशें आमदार व्हेंझी व्हिएगस हांणी सांगलें
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
