इंडियाचें नांव भारत केन्ना जातलें ?

भांगरभूंय | प्रतिनिधी

उच्च न्यायालयाच्या आदेशा प्रमाण केंद्र सरकारान योग्य तीं पावलां उबारचीं हीच अपेक्षा.

केंद्र सरकाराक सर्वोच न्यायालयान संविधानांत सुदारणा करपा खातीर आनी इंडियाचे सुवातेर भारत वा हिंदुस्तान
अशें उतर वापरचें अशें दिल्ल्या आदेशाक रोखडोच पाळो दिवचो अशे निदेश दिल्ली उच्च न्यायालयान दिल्यात. सर्वोच्च न्यायालयान दिल्ल्या ह्या आदेशाक जाता तितले बेगीन पाळो दिवचो हे खातीर योग्य तीं पावलां उबारचीं अशें म्हणलां. भारताचें नांव भारत वा भारत गणराज्य अशेंय आसा. पुर्विल्ल्या काळा सावन जंबुद्वीप भारत खंड हिमवर्षा भारत हीं नांवां लेगीत पुर्विल्ल्या काळा सावन आशिल्लीं दिसतात. भारत देश हो विविधतायेन नटिल्लो आसा. विविधतायेंत एकवट हें भारतीय संस्कृतीचें लक्षण आसा. आयज भारतांत हजारांनी भाशा उलयतात. भारताची सगल्यांत पोरणी भाशा संस्कृत आसा. जाल्यार ऋग्वेद हो ते भाशेंतलो सामको पोरणो ग्रंथ आसा.
जैन अनुश्रुती प्रमाण भगवान ऋषभदेवाच्या ज्येश्ठ पुताचें नांव भरत अशें आशिल्लें. ताचे वेल्यान भारत हें नांव पडलां आसुये. ‘भा’ म्हणल्यार तेज आनी ‘रत’ म्हणल्यार रममाण जाल्लो. हाचोच अर्थ भारत म्हणल्यार तेजांत रममाण जाल्लो देश. ही उपमा सामकी यथार्थ आसा. शकुंतला ही विश्वामित्र ऋषींक मेनका पसून जाल्ली धूव. तिचें लग्न राज दुष्यन्ता कडेन जालें. ताचो पराक्रमी पूत भरत आशिल्लो. ताचे वेल्यान लेगीत भारत अशें नांव पडलां अशें म्हणटात.
26 जानेवारी 1950 दिसा भारतांत घटना सुरू जाली. ते प्रमाण भारत वा इंग्लीशींत इंडिया अशें नांव दिलें. भारत देशांत सुमार 70000 हजार वर्सां पयलीं आदिमानवान प्रवेश केलो. सुमार 9000 वर्सां पयलीं सिंधू संस्कृती अस्तित्वांत आयली. सिंधू संस्कृतीचो काळ इसना पयलीं 3500 वर्स आशिल्लो. एकूणच भारत हें नांव सामकें पुर्विल्ल्या काळा सावन अस्तित्वांत आशिल्लें दिसता. मध्य प्रदेशांतल्या भीमबेटका हांगा मानवान काडिल्ली चित्रां हें लेगीत भारतीय प्राचीन संस्कृतीचें एक दर्शन. उच्च न्यायालयाच्या आदेशा प्रमाण केंद्र सरकारान योग्य तीं पावलां उबारचीं हीच अपेक्षा.
विदेशांतले भारतीय देशांत विक्रमी पयशे धाडटात
आयज विदेशांत नोकरी वा उद्देग ह्या निमतान खूबशे भारतीय वतात. एका आंकडेवारी प्रमाण 1990 वर्सा 66 लाख भारतीयांनी स्थलांतर केलां. ते संख्येंत 2024 मेरेन सुमार 1 कोटी 85 लाख इतली वाड जाल्या. संवसारीक स्थलांतरितां मदीं हो वांटो 4.30 टक्क्या वेल्यान 6 टक्क्याचेर गेला. आयज नोकरी बराबरच खूबशे विद्यार्थी विदेशी शिक्षण घेतात. ती संख्या सुमार जानेवारी 2024 मेरेन 13 लाख 40 हजार इतली पावल्या. हातूंत 32 टक्के विद्यार्थी कॅनडांत जाल्यार अमेरिकेंत 25.3 टक्के विद्यार्थी शिकतात. तशेंच ब्रिटन आनी ऑस्ट्रेलिया ह्या देशांनी खूबशे विद्यार्थी शिक्षण घेतात.
भारतांत 2023-2024 वर्सा जे 118.7 अब्ज डॉलर्स धाडले तातूंत सुमार 27.7 टक्के रक्कम एकल्या अमेरिकेंतल्यान आयली. ताचे फाटोफाट रक्कम युनायटेड अरब अमिरात ह्या देशांतल्यान आयली. ब्रिटन, सिंगापूर, कतार, सावदी अरेबिया हांचोय वांटो व्हड आसा. एकूणच विदेशी भारतीयांनी देशांत पयशे धाडून मोलाची मजत केल्या. विशेश म्हणल्यार ही रक्कम विदेशी गुंतवणुकी परस चड आसा.
आयज विदेशांत वचप्यांची संख्या व्हड प्रमाणांत आसा. शिक्षणा खातीर लेगीत विद्यार्थी व्हड प्रमाणांत वतात. तशें पळोवंक गेल्यार ही सामकी खोशयेची गजाल. मजगतीं, आयज अमेरिकेंत स्थलांतराचे विवीध नेम जटील जायत आसात. तशेंच युक्रेन बी देशांनी झुजाक लागून परिस्थिती सामकी हुस्क्याची जाल्या. अशेय परिस्थितींत खूबशे भारतीय मोलाची कामगिरी बजायत आसात, ही खरें म्हणल्यार तोखणायेची गजाल.
ह्या विदेशांतल्यान आयिल्ल्या पयशा विशीं आनीक एक मजेशीर गजाल म्हणल्यार येवपी डॉलर्सां पैकीं सुमार 20.5 टक्के इतली रक्कम एकल्या महाराष्ट्रांतल्या मनशान धाडल्या. एकूण विचार करीत जाल्यार देशांतले खूबशे विद्यार्थी विदेशांत शिक्षण घेत आसात आनी खूबशे नागरीक विदेशांत नोकरी करतात. हाका लागून विदेशी गुंतवणूक भारतांत जायत आसा. पूण ह्या लोकांच्या बुद्धीमत्तेचो फायदो देशाक जायना. हो फायदो विदेशांतल्या देशांक जाता, ही एक विचार करपा सारकी गजाल. बरे राहणीमान, संगणक मळार खूबश्यो संदी, शिक्षणाच्यो विवीध सोयी आनी बरो पयसो मेळोवपाच्यो संदी हाका लागून विदेशांत वचप्यांच्या आकर्शणांत वाड जायत आसा.
अमेरिकेन 41 टक्के भारतीय विद्यार्थ्यांक व्हिसा न्हयकारलो
अमेरिकेचे राष्ट्राध्यक्ष डॉनाल्ड ट्रम्प हांणी हातांत सुत्रां घेतले उपरांत प्रशासनांत खूबशे क्रांतीकारक निर्णय घेतल्यात. खूबशा देशांक तांणी आयात शुल्क व्हड प्रमाणांत लायला. तशेंच अमेरिकेन खूबश्या विद्यार्थ्यांक एफ-1 हो व्हिसा न्हयकारला. तातूंत भारतीय विद्यार्थी आसात. फाटल्या वर्सांतली आंकडेवारी विचारांत घेत जाल्यार तुमकां ह्या गजालीची याद येतली.
ऑक्टोबर 2023 ते सप्टेंबर 2024 ह्या काळांत 41 टक्के भारतीय विद्यार्थ्यांक व्हिसा न्हयकारलो. हे मुजतींत एफ-1 व्हिसा खातीर 679000 इतल्या विद्यार्थ्यांनी अर्ज दाखल केल्ले. तातूंतले 279000 अर्ज न्हयकारले. ताच्या आदल्या वर्सा न्हयकारिल्ल्या अर्जांची संख्या 36 टक्के इतली आशिल्ली. हाचोच अर्थ असो की ट्रम्प हांणी सत्तेंत येवचे पयलीं सावनूच एफ-1 व्हिसा न्हयकारपाचें प्रमाण आसा. फक्त आतां तातूंत व्हड प्रमाणांत वाड जाल्या.
फाटल्या धा वर्सांतलो एकूण नियाळ घेत जाल्यार अशें दिसता की 2019 वर्सा सुमार 25 टक्के विद्यार्थ्यांक व्हिसा न्हयकारिल्लो. आतां 2014 वर्सा हें प्रमाण सुमार 41 टक्क्यांचेर पावलां. आयज भारतीय विद्यार्थी अमेरिकेंत वा कॅनडांत व्हड प्रमाणांत शिक्षणा खातीर वतात. एकूणच अमेरिकच्या सरकाराचें धोरण सगल्या विद्यार्थ्यांक व्हिसा दिवपाचें दिसून येना. खरें म्हणल्यार ही एक हुस्को करपा सारकी गजाल. हे विशीं भारत सरकारान राजनैतीक पांवड्यार वाटाघाटी करपाची गरज आसा. ताका लागून व्हिसा दिवपाची प्रक्रिया चड जातली.

शांताराम वाघ
9623452553