भांगरभूंय | प्रतिनिधी
चेन्नय, खबरां संस्थाः भारतांतल्या राष्ट्रीयकृत बँकां मदीं एक आशिल्ले इंडियन बँकेन ३०० रित्या पदां खातीर भरती प्रक्रिया सुरू करता. अधिकार्यांच्या पदां खातीर ही भरती जाता. इंडियन बँकेन ह्या पदाचेर ऑनलायन अर्ज आपयल्यात. ह्या पदाचेर अर्ज करपाची निमाणी तारीक २ सप्टेंबर आसा. पात्र उमेदवारांनी ह्या पदाचेर अर्ज करपाक मेळटलो.
इंडियन बँक ही भौशीक मळावेली नामनेची बँक. हे बँकेच्या चेन्नयच्या मुख्यालया वरवीं बँक अधिकारी पदा खातीर अर्ज मागयल्यात. ह्या पदांचेर तामिळनाडू, कर्नाटक, आंध्र प्रदेश, तेलंगाण, महाराष्ट्र आनी गुजरात ह्या राज्यांनी भरती करतले. ह्या राज्यांनी थळावे भाशेन प्राधान्य दितले.
तामिळनाडू १६० सुवातो, कर्नाटकांत ३५, आंध्र प्रदेश आनी तेलंगाणा ५०, महाराष्ट्रांत ४० आनी गुजरातांत १५ अश्यो वट्ट ३०० सुवातो भरतले. हे भरतींत आरक्षणूय आसतलें. अनुसूचित जाती प्रवर्गा खातीर ४४, अनुसूचित जमाती खातीर २१, ओबीसी वर्गा खातीर ७९, अर्थीक नदरेन दुबळे आशिल्ल्या वर्गा खातीर २९, उक्त्या वर्गा खातीर १२७ आनी हेर वर्गा खातीर १२ सुवातो राखीव आसतल्यो.
पिराय आनी शिक्षणीक पात्रताय
थळाव्या बँक अधिकारी पदा खातीर अर्ज करपी उमेदवारांची पिराय २० ते ३० वर्सां मजगतीं आसपाक जाय. जाल्यार ह्या पदा खातीर अर्ज करपी उमेदवार १ जुलय २०२४ दिसा मान्यताय मेळिल्ल्या विद्यापिठांतल्यान पद्वी वा केंद्र सरकारान मान्यताय दिल्ले संस्थे वरवीं समकक्ष पात्रताय घेतिल्लो आसपाक जाय. ह्या पदा खातीर अर्ज करपी निमाणी मुजत २ सप्टेंबर आसा.
थळाव्या बँक अधिकारी पदा खातीर ऑनलायन अर्ज सादर करचे. तशेंच फीय ऑनलायन भरची. एससी, एसटी आनी दिव्यांग प्रवर्गांतल्या उमेदवारांक १७५ रुपया शुल्क दिवचें पडटलें. जाल्यार हेर सगळ्या प्रवर्गां खातीर १ हजार रुपय परीक्षा फी निश्चीत केल्या. ऑनलायन परीक्षा आनी उपरांत मुलाखत अशें हे परिक्षेचें स्वरुप आसतलें. ऑनलायन परीक्षेचो वेळ तीन वरां आसतलो. हे परीक्षेंत पास जावन बँकेंत रुजू जावपी उमेदवारांकूय ४८ हजार ते ८५ हजार रुपयां मेरेन पगार मेळटलो.
चड म्हायती खातीर उमेदवारांनी इंडियन बँकेचे करियर हे पेजीक भेट दिवची आनी मूळ जायरात वाचून अर्ज सादर करचे.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
