भांगरभूंय | प्रतिनिधी
17 वर्सांनी पाकिस्तानाची भोंवडी करपी इंग्लंडान तीन टॅस्टींचे माळेंत 2-0 अशी निर्णायक आघाडी घेतली. ताणें दुसरे टॅस्टींत पाकिस्तानाक 26 धांवड्यांनी हारयलो. इंग्लंडाक 22 वर्सांनी पाकिस्तानांत माळ जिखपाक येस आयलां. हाचे आदीं म्हणल्यार 2001त तीन टॅस्टींची माळ 1-0 फरकान जिखिल्ली.
ही माळ वगडावपा सयत पाकिस्तान वर्ल्ड टॅस्ट चॅम्पियनशिपीचे फायनलीचे रेसींतल्यान भायर पडलो. सध्या तो गुणतकट्यांत सवे सुवातेर आसा. जाल्यार इंग्लंड पांचवे सुवातेर पावलो. सध्या ऑस्ट्रेलिया पयले, दक्षीण आफ्रिका दुसरे आनी श्रीलंका तिसरे सुवातेर आसा. जाल्यार भारत चवथे सुवातेर आसा.
काल चवथ्या दिसा पाकिस्तानाचो दुसरो डाव 102.1 ओव्हरींनी 328चेर सोंपयलो. पाकिस्ताना वतीन सउद सकीलान सगल्यांत चड 94 धांवड्यो केल्यो. जाल्यार इमाम उल हकान 60 धांवड्यांचें योगदान दिलें. ओपनर अब्दुल्लाह शकील आनी मोहम्मद नवाज हांणी दरेकी 45 धांवड्यो केल्यो. मोहम्मद रिजवानान 30 धांवड्यो केल्यो.
इंग्लंडा वतीन मार्क वुडान चार विकेटी घेतल्यो. ओली रॉबिन्सन आनी जिमी अॅण्डरसन हाणें दरेकी 2 विकेटी मेळयल्यो.
पाकिस्तानान 4 बाद 198 धांवड्यां वयल्यान मुखार खेळपाक सुरवात केली. ताका निमाण्या डावांत जैता खातीर 355 धांवड्यांची मोख मेळिल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
