भांगरभूंय | प्रतिनिधी
इंग्लंडान संवसारीक टी-20 सर्तीचे सेमी फायनलींत सुवात मेळयली. आपले दुसरे सुपर आठांतले मॅचींत ताणें पाकिस्तानाक 2 विकेटींनी हारायलो. ह्या जैता सयत ताणें पयल्या चारांत सुवात मेळोवपी पयलो पंगड थारलो.
कॅण्डीच्या पल्लेकेले स्टेडियमाचेर इंग्लंडान 165 धांवड्यांची मोख 19.1 ओव्हरींनी 8 विकेटी व्हगडावन मेळयली. जोफ्रा आर्चरान चवको मारून जैत मेळोवन दिलें. मुखेली हॅरी ब्रुकान 100 धांवड्यांची खेळी केली. विल जॅक्सान नाबाद 28 धांवड्यो केल्यो. पाकिस्तानाच्या शाहिन आफ्रिदीन 4 विकेटी घेतल्यो. उस्मान तारिकाक 2 विकेटी फावो जाल्यो.
मोखीचो फाटलाव करपी इंग्लंडाची सुरवात बाबत जाली. शाहिन आफ्रिदीन फिल सॉल्ट (0) आनी जोस बटलर (2) हांकां बाद करू न इंग्लंडाक सुरवातीकूच धपके दिले. पूण, ब्रुकान 51 बॉलांनी 100 धांवड्यो केल्यो. हातूंत 10 चवके आनी चार सके मारले. ताच्या यत्नांक लागून मॅच इंग्लंडा वटेन घुंवडायली.
ते आदीं पाकिस्तानान टॉस जिखून पयली बॅटींग करपाचो निर्णय घेतलो आनी निर्धारीत 20 ओव्हरींनी 9 विकेटी व्हगडावन 164 धांवड्यो केल्यो. ओपनर साहिबजादा फरहानाक सोडलो जाल्यार एकाय बॅट्समनाक व्हड खेळी करपाक जमूंक ना. साहिबजादान सात चवके आनी दोन सक्यांचे मजतीन 45 बॉलांनी 63 धांवड्यांची खेळी केली. जाल्यार बाबर आजम आनी फखर जमान हांणी 25-25 धांवड्यांचें योगदान दिलें.
इंग्लंडान शिस्तीन बॉलींग घालून पाकिस्तानाचेर कायम चेंपण दवरलें.
पाकिस्तानाची सुरवात बरी जाली ना. सॅम अयुब फक्त 7 धांवड्यांचेर बाद जालो जाल्यार मुखेली सलमान आगा 5 धांवड्यो करून तंबूंत परतलो. साहिबजादान एक बाजू सांबाळून धरली. ताका लागून पाकिस्तानाक 150चो आंकडो हुपपाक शक्य जालें. अखेरच्या ओव्हरींनी शादाबा खानान आक्रमक बॅटींग करून 11 बॉलांनी 23 धांवड्यो केल्यो. इंग्लंडा वतीन लियाम डॉसनान 3 विकेटी मेळयल्यो. जोफ्रा आर्चर आनी जॅमी ओवरटन हांकां 2-2 विकेटी फावो जाल्यो. आदिल रशीदाक एक विकेट मेळ्ळी. एक बॅट्समन धांवबाद जालो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
