इंग्लंड सेमी फायनलींत

भांगरभूंय | प्रतिनिधी

इंग्लंडान संवसारीक टी-20 क्रिकेट सर्तीचे आपले सुपर 12तले निमाणे मॅचींत श्रीलंकेक 4 विकेटींनी हारोवन सेमी फायनलींतली सुवात निश्चीत केली. अशे तरेन सेमी फायनलींतली सुवात निश्चीत करपी इंग्लंड दुसरो पंगड थारलो. एक दीस पयलीं न्युझिलॅण्डान निमाण्या चारांनी सुवात मेळयिल्ली.

इंग्लंडाच्या ह्या जैतान सध्याचो वस्ताद ऑस्ट्रेलियेची सेमी फायनलींत सुवात मेळोवपाचें सपन भंगलें. इंग्लंड आनी ऑस्ट्रेलिया ह्या दोनूय पंगडांचे दरेकी पांच मॅचींतल्यान 7-7 गूण जाल्यात, पूण इंग्लंड बरे धांवगतीच्या नेटार फुडले फेरयेंत सुवात मेळोवपाक येसस्वी थारलो.

मजगतीं, सर्तींतल्यान पयलींच भायर पडिल्ल्या श्रीलंका पंगडान काल टॉस जिखून पयलीं बॅटींग करपाचो निर्णय घेतलो. ताचो ओपनर पाथुम निसांकान आक्रमक बॅटींग करून आपल्या पंगडाक बरी सुरवात करून दिली. ताणें 45 बॉलांनी 67 धांवड्यो केल्यो. पूण, इंग्लंडाच्या बॉलरांनी मॅचींत येसस्वी रितीन पुनरागमन करतना श्रीलंकेचो डाव 8 बाद 141 धांवड्यांचेर आडायलो. एससीजीचे सुके खेळपट्टीचेर मोखीचो फाटलाव करपाक मैदानांत देंवपी इंग्लंडान लेगीत बरी सुरवात केली.

अॅलेक्स हेल्स आनी मुखेली जोस बटलर हांणी पयले विकेटी खातीर 43 बॉलांनी 75 धांवड्यांची भागिदारी केली. हेल्सान 30 बॉलांनी सात चवके आनी एका सक्याचे मजतीन 47 धांवड्यो केल्यो. जाल्यार बटलरान 23 बॉलांनी 28 धांवड्यो केल्यो, हातूंत दोन चवके आनी एका सक्याचो आस्पाव आशिल्लो.

इंग्लंडाक 77 बॉलांनी फक्त 67 धांवड्यांची गरज आशिल्ली. अशा वेळार श्रीलंकेचो स्पिनर वानिंदु हसरंगा डिसिल्वान विकेटी घेवपाक सुरवात केली. आनी पळयता पळयता इंग्लंडाचो अर्दो पंगड तंबूंत परतून गेलो.

हसरंगान दोनूय ओपनर बॅट्समनांक फक्त सात धांवड्यां भितर बाद केले. ते उपरांत धनंजय डिसिल्वान आनी लाहिरू कुमारा हांणी विकेटी घेतल्यो.

इंग्लंडाचो बॅट्समन डॅव्हीड मलान जखमी जाल्ल्यान बॅटींग क्रमवारींत मात्सो बदल केलो.

पंगडाक 33 बॉलांनी 31 धांवड्यांची गरज आशिल्ली. त्या वेळार धनंजयान मोईन अलीक बाद केलो. पूण, इंग्लंडाच्या टॅस्ट पंगडाचो मुखेली बेन स्टोक्सान संयमान बॅटींग करतना चवको मारून पंगडाक दोन बॉल आनी चार विकेटी राखून जैत मेळोवन दिलें. क्रिस वोक्सान (नाबाद 5) ताका साथ दिली.