भांगरभूंय | प्रतिनिधी
ओपनर बॅट्समन जोस बटलर आनी अॅलेक्स हेल्स हांच्या अर्द शेंकड्यां नेटार सॅम कुरेन आनी क्रिस वोक्स हांच्या जबरदस्त बॉलिंगे नेटार इंग्लंडान बळिश्ट न्युझिलॅण्ड पंगडाक संवसारीक टी-20 क्रिकेट सर्तीच्या सुपर 12तले म्हत्वाचे मॅचींत 20 धांवड्यांनी हारयलो. ह्या जैता सयत इंग्लंडान सेमी फायनलीचे सर्तींतलें आव्हान कामय राखलें.
इंग्लंडान दिल्ले 180 धांवड्यांचे मोखीचो फाटलाव करतना न्युझिलॅण्डाक 6 विकेटी वगडावन 159 धांवड्यो करप शक्य जाल्यो. ग्लॅन फिलिप्सान (62) अर्द शेंकडो मारपा खेरीत मुखेली केन विलियम्सना (40) वांगडा तिसरे विकेटी खातीर 91 धांवड्यांची भागिदारी केली, पूण ही भागिदारी पंगडाक जैत मेळोवन दिवपाक शकली ना. ह्या जैता सयत ग्रुप एकांत इंग्लंडा सयत दोन पंगडांचे चार मॅचींतल्यान पांच गूण जाल्यात. न्युझिलॅण्ड आनी ऑस्ट्रेलिया ह्या पंगडांचे लेगीत तितकेच गूण आसात.
बरे रन रेटीक लागून न्युझिलॅण्ड पयले आनी इंग्लंड दुसरे सुवातेर आसा.
ते पयलीं मुखेली बटलर आनी हेल्स हांणी पयले विकेटी खातीर 81 धांवड्यांची भागिदारी केली. हे भागिदारी नेटार इंग्लंडान 8 विकेटी वगडावन 179 धांवड्यो केल्यो. बटलरान 47 बॉलांनी 73 धांवड्यो केल्यो. हातूंत सात चवके आनी दोन सके मारले. हेल्सान 40 बॉलांनी 52 धांवड्यो केल्यो. ताणें सात चवके आनी एक सको मारलो.
न्युझिलॅण्ड आपली पांचवी आनी निमाणी मॅच 4 नोव्हेंबराक आयर्लेण्डा आड खेळटलो, जाल्यार इंग्लंडाची मॅच श्रीलंके आड जातली.
मजगतीं, मोखीचो फाटलाव करपी न्युझिलॅण्डाची सुरवात बरी जाली ना. पांचवे ओव्हरींत 28 धांवड्यो करतना ताणें दोनूय ओपनर वगडायले. डॅव्होन कॉन्वेन 3 आनी फिल अॅलेनान 16 धांवड्यो केल्यो. ते उपरांत विलियम्सन आनी श्रीलंके आड शेंकडो मारपी फिलिप्स हांणी न्युझिलॅण्डाचो डाव सांबाळ्ळो.
न्युझिलॅण्डान पावर प्लेंत 2 विकेटी वगडावन 40 धांवड्यो केल्यो. फिलिप्साक चार धांवड्यांचेर जीवनदान मेळिल्लें. ताचो ताणें फायदो घेत आक्रमक बॅटींग करतना अर्द शेंकडो पुर्ण केलो. ताणें 14वे ओव्हरींत पंगडाचो स्कोर 100 मेरेन पावयलो. फिलिप्सान राशिदाचे ओव्हरींत दोन धांवड्यो घेत फक्त 25 बॉलांनी अर्द शेंकडो पुर्ण केलो.
मजगतीं, विलियम्सनान बेन स्टोक्साच्या बॉलाचेर शॉर्ट थर्ड मॅन वाठारांत राशिदाक सोंपी कॅच दिली. न्युझिलॅण्डाक निमाण्या पांच ओव्हरींनी जैता खातीर 57 धांवड्यांची गरज आशिल्ली. वुडान जेम्स निशामाक (6) बाद करून न्युझिलॅण्डाक चवथो धपको दिलो. जाल्यार फुडले ओव्हरींत वोक्सान बॉलाचेर डॅरील मिशेलाक (3) बाद केलो. निमाण्या तीन ओव्हरींनी न्युझिलॅण्डाक 49 धांवड्यांची गरज आशिल्ली. फिलिप्स लेगीत व्हड शॉर्ट खेळपाच्या यत्नांत कुरेनाच्या बॉलाचेर जॉर्डनाक कॅच दिवन तंबूंत परतलो.
मिशेल सेंटनर (नाबाद 16) आनी ईश सोधी (नाबाद 6) हांणी उपरांत हारीचें अंतर उणें केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
