भांगरभूंय | प्रतिनिधी
इंग्लंड पंगडान युरो करंड फुटबॉल सर्तीचे दुसरे सेमी फायनलींत नॅदरलॅण्ड पंगडाक 2-1 हारोवन सेगीत दुसरे खेपे फायनलींत सुवात मेळयली. तशेंच इंग्लंड पयलेच खेपे देशा भायर आयोजीत केल्ले व्हड सर्तीचे फायनलींत पावलो. हाचे आदीं म्हणल्यार 1966 वर्साची संवसारीक फुटबॉल सर्त आनी 2020तली युरो करंड सर्त इंग्लंडांत जाल्ली आनी दोनूय सर्तीचे फायनलींत येजमान इंग्लंड खेळिल्लो. 1966ची संवसारीक सर्त जिखपाक ताका येस आयिल्लें, जाल्यार 2020चे युरो करंड सर्तींत ताका उप वस्तादपणाचेर समाधान मानचें पडिल्लें.
14 जुलयाक जावपी फायनलींत इंग्लंडाचो पंगड स्पेना आड खेळटलो. इंग्लंडाक वट्ट 58 वर्सांनी एखाद्र्या व्हड सर्तीचें वस्तादपण जोडपाची संद आसा. इंग्लंडा हाचे पयलीं म्हणल्यार 1966ची संवसारीक सर्त जिखिल्ली. मॅच सोंपपाक कांय मिनटां बाकी आशिल्लीं, त्या वेळार दोनूय पंगड 1-1 अशे बरोबरींत आशिल्ले. मॅचीचो निकाल लावपाक शुटआवटाचो आदार घेवचो पडटलो अशें दिशिल्लें. पूण, इंग्लंडाच्या ऑली वॉटकिन्सान अतिरिक्त वेळांत गोल करून इंग्लंडाची आघाडी 2-1 अशी केली.
मॅचीच्या 10व्या मिनटाक जावी सिमन्सान गोल करून नॅदरलॅण्डाक आघाडी मेळोवन दिल्ली. पूण, तांची ही आघाडी चड वगत तिगूंक ना. आठ मिनटांनी म्हणल्यार 18व्या मिनटाक हॅरी केनान गोल करून इंग्लंडाक बरोबरींत हाडलो. ह्या गोला उपरांत इंग्लंडांच्या खेळगड्यां मदीं वेगळीच उर्जा निर्माण जाली आनी मध्यांतरा मेरेन गोल करपाच्यो साबार संदी तांणी निर्माण केल्यो.
मॅचीच्या 25व्या मिनटा मेरेन इंग्लंडाक गोल करपाच्यो चार संदी तयार केल्यो आनी बॉल चड वगत आपले कडेन दवरलो. 38व्या मिनटाक गोल करपाक लागीं पाविल्लो. पूण, नॅदरलॅण्डाच्या गोलकीपरान उत्कृश्ट रितीन बॉल आडायलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
