भांगरभूंय | प्रतिनिधी
येजमान पाकिस्ताना आडचे दुसरे टॅस्टीच्या पयल्या दिसा इंग्लंडाचो पयलो डाव 281 धांवड्यांचेर सोंपलो. टॅस्ट पदार्पण करपी लेग स्पिनर अबरार अहमदान 7 विकेटी घेतल्यो. जाल्यार जाहिद महमूदाक तीन विकेटी फावो जाल्यो.
तीन टॅस्टींचे माळेंत 1-0 असो मुखार आशिल्ल्या इंग्लंडान टॉस जिखून पयलीं बॅटींग करपाचो निर्णय घेतलो. बेन डकेटान 63 आनी ओली पोपान 60 धांवड्यो केल्यो. हेर बॅट्समनांक खाशेलें प्रदर्शन करपाक जमूंक ना.
पयल्या दिसाचो खेळ सोंप मेरेन पाकिस्तानान 2 विकेटी वगडावन 107 धांवड्यो केल्यात. मुखेली बाबर आजम 61 आनी सऊद शकिल 32 धांवड्यो करून खेळपट्टीचेर आसा.
इमाम उल हकाक अॅण्डरसनान जाल्यार शफिकाक जॅक लिचान बाद केलो. पयले टॅस्टींत 6.5 परस चड रन रेटीन धांवड्यो करपी इंग्लंडाक कालूय जलद रितीन धांवड्यो करपाक सुरवात केली. पयल्या सत्रांत 31 ओव्हरींनी 5 विकेटी वगडावन 181 धांवड्यो केल्ल्यो. पूण उपरांत 51.4 ओव्हरींनी 281चेर ताचो डाव सोंपलो.
टॅस्ट पदार्पण करपी पाकिस्तानाच्या अबरार अहमदान आपले पयलेच ओव्हरींत पाकिस्तानाक येस मेळोवन दिलें. ताणें जॅक क्रॉवलेक बोल्ड केलो. ते उपरांत डकेट, पोप, रुट, ब्रुक, स्टोक्स आनी जॅक्स हांकां तंबूंत धाडले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
