भांगरभूंय | प्रतिनिधी
संवसारीक वन डे क्रिकेट सर्तीची सातवी मॅच सध्याचो वस्ताद इंग्लंड आनी बांगलादेश ह्या पंगडां मदीं हांगाच्या हिमाचल प्रदेश क्रिकेट असोसिएशनाच्या स्टेडियमाचेर जातली. इंग्लंडाक आपले पयले मॅचींत न्युझिलॅण्डा कडल्यान हार घेवची पडिल्ली, जाल्यार बांगलादेशान अफगाणिस्ताना आड जैत जोडिल्लें.
धर्मशालाच्या ह्या मैदानाचेर धांवड्यांचो पावस पडटा. तशेंच फास्ट बॉलरांक लेगीत मजत मेळटा. धर्मशालाच्या ह्या मैदानाचेर अजून मेरेन पांच वन डे मॅची जाल्यात. हातूंतल्यो चार मॅची धांवड्यांचो फाटलाव करपी पंगडांनी जिखल्यात. जाल्यार फकत एके मॅचींत पयलीं बॅटींग करपी पंगड जिखला. सगल्यांत व्हड स्कोर भारतान केला. वॅस्ट इंडिजा आड खेळटना ताणें 330 धांवड्यो केल्ल्यो, जाल्यार सगल्यांत उणो स्कोर 112 आसा.
इंग्लंड जैताचें खातें उगडपाक इत्सूक आसतलो, जाल्यार दुसरे वटेन बांगलादेश सेगीत दुसरें जैत जोडपाक सोदतलो.
दोनूय पंगडां मदीं संवसारीक सर्तींत कांय उत्कृश्ट मॅची जाल्यात. बांगलादेशान 2011 आनी 2015तले संवसारीक वन डे सर्तींत इंग्लंडाक हारयला. आयचे मॅचींत लेगीत बांगलादेश इतिहासाची पुनरावृत्ती करपाक इत्सूक आसतलो. दुसरे वटेन इंग्लंडाचो पंगड न्युझिलॅण्डा आडची हार विसरून जैत जोडपाक सोदतलो.
इंग्लंडा खातीर मोठो धपको म्हणल्यार ताचो अश्टतासांचो खेळगडो बेन स्टोक्स हे मॅची खातीरूय उपलब्ध आसचो ना.
सरावाचे मॅचींत इंग्लंडान बांगलादेशाक हारयिल्लो. ते मॅचींतलो अणभव हे मॅचींत कामाक येवपाक शकता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
