भांगरभूंय | प्रतिनिधी
युरो करंड वस्ताद इंग्लंड पंगडान बायलांचे संवसारीक फुटबॉल सर्तीचे फायनलींत सुवात मेळयली. काल जाल्ले दुसरे सेमी फायनलींत ताणें येजमान ऑस्ट्रेलिया पंगडाक 3-1 अशा गोल फरकांनी हारयलो.
इंग्लंड पयले खेपे बायलांचे संवसारीक फुटबॉल सर्तीचे फायनलींत पावलो. आयतारा सिडनी शारांत जावपी फायनलींत तो स्पेन पंगडा आड खेळटलो.
इंग्लंडान पयल्या अर्दांत आक्रमक खेळ केलो. ताचो फायदो ताका 36व्या मिनटाक जालो. हो गोल एला टून हिणें केलो. ह्या गोला उपरांत इंग्लंडान आपली आघाडी कायम राखली. मध्यांतरा मेरेन इंग्लंड 1-0 असो मुखार आशिल्लो.
दुसऱ्या अर्दांत ऑस्ट्रेलिया पंगडान प्रती हल्लो केलो. अखेरेक 63व्या मिनटाक बरोबरीचो गोल करपाक ऑस्ट्रेलिया पंगडाक येस आयलें. हो गोल सेम केर हिणें केलो.
1-1 अशा बरोबरी उपरांत इंग्लंडान मॅचीचेर आपलो शेक दवरपाक सुरवात केली. 71व्या मिनटाक लॉरेन हॅम्पान गोल करून स्कोर 2-1 असो केलो. 86व्या मिनटाक एलिसिया रुसोन गोल करून मॅच पुर्णपणान इंग्लंडा वटेन घुंवडायली.
ऑस्ट्रेलिया आतां तिसरे सुवाते खातीर 19 ऑगस्टाक स्विडन पंगडा आड खेळटलो. ते पयलीं जाल्ले पयले सेमी फायनलींत स्पेन पंगडान स्विडनाक 2-1 असो हारयलो.
स्पेन आनी इंग्लंड हे पंगड अजून एकूय संवसारीक सर्त जिखूंक नाशिल्ल्यान. अंदूं संवसाराक नवो चॅम्पीयन मेळटलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
