इंग्लंड चॅम्पियन्स ट्रॉफीक पात्र

भांगरभूंय | प्रतिनिधी

पाकिस्तानाचो संवसारीक वन डे क्रिकेटीचो प्रवास हारीन सोंपलो. इंग्लंडा आडचे मुळाव्या पांवड्या वयले निमाणे मॅचींत पाकिस्तानाक 93 धांवड्यांनी हार घेवची पडली. दुसरे वटेन इंग्लंडान ह्या जैता सयत 2025त पाकिस्तानांत जावपी चॅम्पियन्स ट्रॉफीतली सुवात निश्चीत केली. सध्याचो वस्ताद इंग्लंडाची सर्तींतली सुरवात पळयली जाल्यार चॅम्पियन्स ट्रॉफीतली ताची सुवात धोक्यांत आयिल्ली. संवसारीक सर्तींतल्या पयल्या आठ पंगडांकूच चॅम्पियन्स ट्रॉफींत खेळपाक मेळटलें आनी ह्या जैतान इंग्लंडान सातवे सुवाते सयत सर्तीचो निरोप घेतलो.

सेमी फायनलींत सुवात मेळोवपा खातीर पाकिस्तानाक 40 बॉलांनी जैत जोडप गरजेचें आशिल्लें. पूण तें शक्य नाशिल्लें आनी ताचें आव्हान सोंपलें. अब्दुल्लाह शफिक (0) आनी फखर जमान (1) हे अपेशी थारले. मुखेली बाबर आजमान 38 धांवड्यो केल्यो. मोहम्मद रिझवान 36 धांवड्यांचेर बोल्ड जालो. फाटोफाट सौद शकीलूय (29) बाद जाल्ल्यान पाकिस्तानाचो अर्दो पंगड 27.5 ओव्हरींनी 126 धांवड्यांचेर तंबूंत गेल्लो. हॅरिस रौफ आनी मोहम्मद वसीम ज्युनियर हाणें धावे विकेटी खातीर 35 बॉलांनी 53 धांवड्यांची भागिदारी केली. रौफ 35 धांवड्यो करून बाद जाल्ल्यान पाकिस्तानाचो डाव 43.3 ओव्हरींनी 244चेर सोंपलो आनी इंग्लंडान 93 धांवड्यांनी जैत जोडलें.

ते पयलीं बॅटींग करपी इंग्लंडाच्या डॅव्हिड मलान (31) आनी जॉनी बॅयरस्टो (59) हाणें 82 धांवड्यांची भागिदारी केली. जो रुट आनी बेन स्टोक्स हाणें तिसरे विकेटी खातीर 131 बॉलांनी 132 धांवड्यांची भागिदारी केली. फाटले मॅचींत शेंकडो नोंदोवपी स्टोक्सान 76 बॉलांनी 11 चवके आनी दोन सक्यांचे मजतीन 84 धांवड्यो केल्यो. जो रुट 72 बॉलांनी 60 धांवड्यो करून शाहीन आफ्रिदीच्या बॉलाचेर बाद जालो. जॉस बटलर आनी हॅरी ब्रुक हाणें 26 बॉलांनी 42 धांवड्यांची भागिदारी केली. ब्रुकान 17 बॉलांनी 30 धांवड्यो केल्यो. बटलर 17 बॉलांनी 27 धांवड्यो करून धांवबाद जालो. इंग्लंडान 50 ओव्हरींनी 337 धांवड्यो केल्यो.