भांगरभूंय | प्रतिनिधी
संवसारीक टी-20 क्रिकेटीच्या इतिहासांत आतां मेरेन खंयच्याच पंगडाक वस्तदापणाची राखण करपाक जमूंक ना. वॅस्ट इंडीजान सगल्यांत चड दोन खेपे किताब जिखला. पूण, दोन वेगळ्यावेगळ्या वर्सांनी. हो इतिहास बदलपाच्या यत्नांत ऑस्ट्रेलिया आसा. पूण, पावसान घाल मारलो. न्युझिलॅण्डा आडचे पयले मॅचींत हार घेतल्या उपरांत ऑस्ट्रेलियेन अ गटांतले आपले दुसरे मॅचींत श्रीलंकेक हारोवन स्वताक सर्तींत कायम दवरलो. इंग्लंडा आडची कालची मॅच तांचे खातीर म्हत्वाची आशिल्ली. पूण, पावसान घात केलो.
मॅलबॉर्न मैदानाचेर काल दोन मॅचींचें आयोजन केल्लें. अफगाणिस्तान आनी आयर्लेण्ड ह्या पंगडां मदी जावपाक आशिल्ली पयली मॅच लेगीत एकूय बॉल घालिनासतना पावसाक लागून रद्द करची पडली. मॅच रद्द जाल्ल्यान दोनूय पंगडांक दरेकी एक गूण फावो जालो.
अफगाणिस्तानाची दुसरी मॅच पावसाक लागून रद्द जाली. न्युझिलॅण्डा आडची ताची मॅच लेगीत पावसान व्हांविल्ली. पावसाचो फायदो आयर्लेण्डाक जाला अशें म्हणपाक जाया. इंग्लंडा आडची मॅच ताणें डकवर्थ लुईस नेमा खाला पांच धांवड्यांनी जिखिल्ली. कालची मॅच रद्द जाल्ल्यान आयर्लेण्ड तीन गुणां सयत अ गटांत दुसरे सुवातेर पावलो. अफगाणिस्तान दोन गुणां सयत निमाणे सुवातेर आसा.
आयर्लेण्ड-अफगाणिस्तान ह्या पंगडां मदली मॅच रद्द जाल्या उपरांत इंग्लंड आनी ऑस्ट्रेलिया ह्या पंगडां मदली मॅच लेगीत पावसाक लागून रद्द जातली अशी चिन्नां दिसपाक लागिल्लीं. भारताच्या वेळा प्रमाण दनपारां 1.30 वरांचेर सुरू जावपी मॅच पावसाक लागून मुखार धुकल्ली. दनपारां 3 वरांचेर अंपायरांनी मैदानाची पळोवणी केली. मॅच आतां तरी सुरू जातली अशें दिशिल्लें. पूण, पावसान परतून आपली हाजेरी लायली आनी ताका लागून अखेरेक कालची दुसरीय मॅच रद्द करची पडली.
न्युझिलॅण्ड, इंग्लंड आनी आयर्लेण्ड हांचे दरेकी तीन गूण जाल्यात, पूण न्युझिलॅण्डक दोनूय मॅची खेळ्ळा, जाल्यार आयर्लेण्ड आनी इंग्लंड दरेकी तीन मॅची खेळ्ळा. ऑस्ट्रेलियेचे तीन मॅचींतल्यान तीन गूण जाल्यात आनी तो पयल्या चारांनी पावला. श्रीलंका आनी अफगाणिस्तान हांचे दरेकी दोन गूण आसात.
न्युझिलॅण्ड आनी श्रीलंका हांच्यो दरेकी तीन मॅची बाकी आसात. हे फाटभुंयेर न्युझिलॅण्ड अ गटांतल्यान सेमी फायनलींत पावपाचे सर्तींत सगल्यांत मुखार आसा. ऑस्ट्रेलियेक लेगीत सेमी फायनलींत पावपाची संद आसा. ताच्या फुडल्यो मॅची अफगाणिस्तान आनी आयर्लेण्ड ह्या पंगडां आड आसात. दोनूय मॅची जिखून तो सेमी फायनलीचे सर्तींत आस्त बाळगून रावपाक शकता.
इंग्लंड, आयर्लेण्ड आनी अफगाणिस्तान हांकां लेगीत ऑस्ट्रेलिये भशेनूच सेमी फायनलींत पावपाची संद आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
