इंग्लंडान बिटकी कवळ्ळी

भांगरभूंय | प्रतिनिधी

ऑस्ट्रेलियान काल जाल्ले दुसरे मॅचींत सध्याचो वस्ताद इंग्लंडाक हारोवन संवसारीक वन डे क्रिकेट सर्तीचे सेमी फायनलींत सुवात मेळोवपा वटेन पावल मारलें. ताणें इंग्लंडाक 33 धांवड्यांनी हारयलो. इंग्लंडाक सातवे मॅचींत हार घेवची पडली आनी ताचें सर्तींतलें आव्हान सेगीत सोंपलें. संवसारीक वन डे क्रिकेट सर्तींत पयले सात पंगड 2025त पाकिस्तानांत जावपी चॅम्पियन्स ट्रॉफींत खेळटले. तातूंत खेळपाची संद लेगीत इंग्लंडान वगडायली. हो ताका बशिल्लो दोट्टी धपको आशिल्लो. ऑस्ट्रेलियेन 10 गुणां सयत गुण तकट्यांतली तिसरी सुवात घटमूट केली. ताका फुडल्यो दोन मॅची अफगाणिस्तान (7 नोव्हेंबर) आनी बांगलादेश (11 नोव्हेंबर) ह्या पंगडां आड खेळपाच्यो आसात.

टॉस हारल्या उपरांत पयलीं बॅटींग करपी ऑस्ट्रेलियेन 49.3 ओव्हरींनी 286 धांवड्यो केल्यो.ट्रॅव्हिस हेड (11) आनी डॅव्हिड वॉर्नर (15) हे रोखडेच बाद जाल्या उपरांत स्टीव्ह स्मिथ (44) आनी मार्नस लाबशेन (71) हाणें तिसरे विकेटी खातीर 71 धांवड्यांची भागिदारी केली. मदल्या ओव्हरींनी ऑस्ट्रेलियेन पुनरागमन केल्लें. पूण, इंग्लंडाच्या बॉलरांनी तांकां परतून बॅकफुटाचेर धुकल्ले. कॅमेरून ग्रीन (47) आनी मार्कस स्टॉयनीस (35) हांणी बरी बॅटींग केली. अखेरच्या ओव्हरींनी अॅडम झम्पान 29 धांवड्यांचें म्हत्वाचें योगदान दिलें.

इंग्लंडा वतीन क्रिस वोक्सान 54 धांवड्यो दिवन 4, मार्क वुडान 70 धांवड्यो दिवन 2 आनी आदील राशिदान 38 धांवड्यो दिवन 2 विकेटी घेतल्यो.

मोखीचो फाटलाव करपी इंग्लंडाची सुरवात बरी जाली ना. मिचेल स्टार्कान पयल्याच बॉलाचेर जॉनी बॅयरस्टोक बाद केलो. ते उपरांत स्टार्काचे बॉलिंगेचेर स्टॉयनीसान जो रुटाची सोंपी कॅच सोडली. पांचवे ओव्हरींत स्टार्कान ही विकेट मेळयली. पूण, ताचें स्रय पॉयण्टाचेर उबो आशिल्ल्या लाबशेनाक वता. बॉल बॅटाक लागून विकेटकीपराच्या हातांत गेलो. पूण, कोणेनूच अपील करूंक ना. लाबसेनान डीआरएस घेवपाक लायलें आनी रुटाक (13) तंबूंत वचचें पडलें. बेन स्टोक्स आनी डॅव्हिड मलान हांणी 108 बॉलांनी 84 धांवड्यांची भागिदारी करून इंग्लंडाची आस्त जिवी दवरली. पॅट कमिन्सान ही भागिदारी फोडली. मलानान 64 बॉलांनी चार चवके आनी एका सक्याचे मजतीन 50 धांवड्यो करून बाद जालो.

मुखेली जॉस बटलर (1) अपेशी थारलो. ताका झम्पान बाद केलो. धांवड्यो आनी बॉल हांचे मदलें अंतर सातत्यान वाडतालें. स्टोक्स आनी मोईन अली हाणें 63 धांवड्यांची भागिदारी करून ऑस्ट्रेलियेक बॅकफुटाचेर धुकलपाचो यत्न फसलो. झम्पान 36वे ओव्हरींत स्टोक्साक (64) बाद केलो. पॅट कमिन्सान लिएम लिव्हिंगस्टोनाक बाद करून मॅच ऑस्ट्रेलिये वटेन हाडली. तातूंत झम्पान आनीक एक सेट जाल्लो मोईन अलीक (42) बाद करून ऑस्ट्रेलियेचें जैत लागीं लागीं निश्चीत केलें. डॅव्हिड विलीक (15) जोश हेझलवुडान बाद केलो.

आदील राशिद आनी क्रिस वोक्स (32) हांणी 37 धांवड्यांची भागिदारी करून इंग्लंडा खातीर संघर्श केलो. पूण, स्टॉयनीसान णववो धपको दिलो. हेझलवुडान निमाणी विकेट घेवन इंग्लंडाचो डाव 253चेर आडायलो आनी ऑस्ट्रेलियेक 33 धांवड्यांनी जैत मेळोवन दिलें.