भांगरभूंय | प्रतिनिधी
इंग्लंडाचो क्रिकेट पंगड फुडल्या वर्सा 5 टॅस्टींची माळ खेळपाक भारताचे भोंवडेर येतलो. हे माळे खातीर इंग्लंडान काल 16 वांगड्यांच्या पंगडाची घोशणा केली. फास्ट बॉलर गुस एटकिन्सन, स्पिनर टॉम हार्टली आनी शोएब बशीर ह्या नव्या चेऱ्यांक पंगडांत सुवात दिल्या.
एटकिन्सनान फाटल्या कावण्टी हंगामांत 5 मॅचींनी खेळटना 20 विकेटी घेतिल्ल्यो. हे कामगिरीच्या नेटार सर्रे क्लबान सेगीत दुसरे खेपे वस्तादपण जोडिल्लें. हार्टली आनी बशीर हे फाटल्या म्हयन्यांत युएई हांगा इंग्लंडाच्या पंगडा वतीन सरावा खातीर गेल्ले. थंय तांणी टॅस्ट पंगडाचो उप मुखेली ओली पोप आनी जॅक लीच हांच्या मार्गदर्शनाखाला सराव केल्लो. रेहान अहमद हाचें लेगीत टॅस्टींत पुनरागमन जालां. पोरूं डिसेंबरांत पाकिस्ताना आड पदार्पण करतना ताणें पांच विकेटी घेतिल्ल्यो.
पयली टॅस्ट 25 ते 29 जानेवारी मेरेन हैदराबादांत चलतली, दुसरी टॅस्ट 2 ते 6 मजगतीं व्हायझेकांत, तिसरी टॅस्ट 15 ते 19 मेरेन राजकोटांत, चवथी मॅच 23 ते 27 मेरेन रांचींत आनी पांचवी टॅस्ट 7 ते 11 जानेवारी मेरेन धर्मशालांत जातली.
इंग्लंडाचो पंगड असोः बेन स्टोक्स (मुखेली), रेहान अहमद, जेम्स अॅण्डरसन, गुस एटकिन्सन, जॉनी बॅयरस्टो, शोएब बशीर, हॅरी ब्रुक, झॅक क्रॅवली, बेन डकेट, बेन फॉक्स, टॉम हार्टली, जॅक लीच, ऑली पोप, ऑली रॉबिन्सन, जो रुट आनी मार्क वूड.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
