भांगरभूंय | प्रतिनिधी
येजमान इंग्लंडान ब्रिस्टलांत जाल्ले दुसरे टी-20 मॅचींत वॅस्ट इंडिज पंगडाक 4 विकेटींनी हारायलो. ह्या जैता सयत इंग्लंडान तीन टी-20 मॅचींचे माळेंत 2-0 अशी निर्णायक आघाडी घेतली.
वॅस्ट इंडिजान पयलीं बॅटींग करतना 6 विकेटी व्हगडावन 196 धांवड्यो केल्यो. ताका जाप दितना इंग्लंडान 6 विकेटी व्हगडावन मोख मेळयली.
ते आदीं इंग्लंडान टॉस जिखून पयलीं फिल्डिंग करपाचो निर्णय घेतलो. वॅस्ट इंडिजाची सुरवात बाबत जाली. पयल्याच बॉलाचेर एविन लुईस बाद जालो. ते उपरांत मुखेली शाई होप आनी दुसरो ओपनर जॉन्सन चार्ल्स हांणी डाव सांबाळ्ळो. तांणी दुसरे विकेटी खातीर 66 बॉलांनी 90 धांवड्यांची भागिदारी केली.
पंगडाचो स्कोर 90 जाल्लो त्या वेळार होप बाद जालो. ताणें 38 बॉलांनी 49 धांवड्यो केल्यो. होप बाद जाल्या उपरांत एविन लुईस, शेरफेन रदरफोर्ड आनी जॉन्सन चार्ल्स लेगीत रोखडेच बाद जाले. अशे तरेन वॅस्ट इंडिजान 117 धांवड्यांचेर 4 विकेटी व्हगडायल्यो. चार्ल्सान 39 बॉलांनी 47 धांवड्यो केल्यो.
पांचवे विकेटी खातीर रोमारियो शेफर्ड आनी रोवमॅन पॉवेल हांणी 13 बॉलांनी 31 धांवड्यांची भागिदारी केली. पॉवेल 34 धांवड्यो करून बाद जालो.
सवे विकेटी खातीर शेफर्डान जेसन होल्डरा वांगडा 14 बॉलांनी 42 धांवड्यांची भागिदारी करून स्कोर 190च्या वयर पावयलो. होल्डरान 9 बॉलांनी नाबाद 29 धांवड्यो केल्यो.
इंग्लंडा वतीन वुडान 25 धांवड्यो दिवन 2, ब्रायडन कार्सान 42 धांवड्यो दिवन 1 आनी जेकब बेथलान 24 धांवड्यो दिवन 1 विकेट मेळयली.
197 धांवड्यांचो फाटलाव करपी इंग्लंडाची सुरवात बाबत जाली. 9 धांवड्यांचेर जेमी स्मिथ बाद जालो. ते उपरांत जोस बटलर आनी बेन डकेट हांणी दुसरे विकेटी खातीर 37 बॉलांनी 63 धांवड्यांची भागिदारी केली.
बटलरान तिसरे विकेटी खातीर हॅरी ब्रुका वांगडा 29 बॉलांनी 40 धांवड्यांची भागिदारी केली. सवे विकेटी खातीर टॉम बेंटनान जॅकब बेथेला वांगडा 15 बॉलांनी 43 धांवड्यांची भागिदारी करून इंग्लंडाक जैत मेळोवन दिलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
