भांगरभूंय | प्रतिनिधी
खबरां संस्था
मुंबयः आयपीएलांतले फ्रेंचायजीच आपले पंगड आयपीएलांतच न्हय जाल्यर यूएई, अमेरिका, दक्षीण आफ्रिका आनी वेस्ट इंडिजांतल्या टी-20 लिगांत देंवोवपाक लागल्यात. आयपीएलांतले पंगड सिझना प्रमाण खेळगड्यां कडेन कबलात करतात. मात आतां हे पंगड खेळगड्यां कडेन वर्सुकी कबलात करपाच्या यत्नांत आसात. ते खातीर इंग्लंडाच्या 6 वरिश्ठ खेळगड्यां कडेन संपर्क सादला. हे दर एका खेळगड्याक चडांत चड 50 कोटी रुपये मेळपाक शकतात. फेडरेशन ऑफ इंटरनॅशनल क्रिकेटर्स असोसिएशनच्या (फिका) रिपोर्टा प्रमाण इंग्लंडूच न्हय जाल्यार ऑस्ट्रेलिया, न्यूझीलंड, वेस्ट इंडिज आनी दक्षिण आफ्रिकेच्या खेळगड्यांक लेगीत अशे तरेचे प्रस्ताव मेळपाक लागल्यात.
आयपीएलांतल्या पंगडां कडल्यान मेळपी हे प्रस्ताव पळयल्यार हाचेर एकूच उपाय आसा. तो म्हणल्यार सगल्या क्रिकेट बोर्डांनी एकठांय येवून द्विपक्षीय माळेंत टी-20 लिगाचो आसपाव करपाचो. जाल्यार खेळगडे टी-20 लिगांतल्या पयशां खातीर कितेंय करतले अशें फिकाचो कार्यकारी संचालक हिथ मिल्स हांणें म्हणलां. दुसरे वटेन सौदी अरेबिया आयपीएला प्रमाण गिरेस्त टी-20 लीग आयोजीत करपाचे तयारेंत आसा.
आयपीएलांतल्या पंगडांनी दिल्ले व्हडले प्रस्ताव बीसीसीआय खातीर तकडीफोड थारपाक शकतात. बीसीसीआय सेंट्रल कॉन्ट्रेक्टा प्रमाण टॉप ग्रेडींतल्या खेळगड्यांक वर्साक चडांत चड 7 कोटी रुपया दिता. त्या भायर मॅच शुल्क म्हणून अतिरिक्त रक्कम मेळटा. एक टॅस्ट मॅची खातीर मॅच फी म्हणून 15 लाख, वन-डे खातीर 6 लाख आनी टी-20 खातीर 3 लाख रुपये मेळटात. एकाद्रो खेळगडो मॅच फींतल्यान चडांत चड 3.69 कोटी रुपये जोडपाक शकतात. सेंट्रक कॉन्ट्रेक्टाचे 7 कोटी धरून व्हो आंकडो 10.69 कोटी मेरेन वता. ही रक्कम आयपीएल पंगड दिवपाक सोदता त्या 50 कोटी रुपयां परस सामकी उणी आसा. वेस्ट इंडिज, दक्षीण आफ्रिका, इंल्गंड आनी न्यूझीलंडाच्या जायत्या खेळगड्यांनी सेंट्रल कॉन्ट्रेक्ट सोडल्यात. ताका लागून फुडल्या कांय म्हयन्यात ह्या खेळगड्यांक आयपीएलाचे पंगड घेवपाक शकतात. ही कबलांत चडांत चड 7 म्हयन्यां खातीर आसतली बाकीच्या म्हयन्यांत हे खेळगडे आंतरराष्ट्रीय मॅची खेळपाक शकतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
