इंग्लंडाच्या जैतान पाकिस्तानाची आस्त कायम

भांगरभूंय | प्रतिनिधी

संवसारीक टी-20 सर्तींत काल जाल्ले सुपर आठांतले एके उमळशीक वाडोवपी मॅचींत इंग्लंड पंगडान न्युझिलॅण्ड पंगडाक 4 विकेटींनी हारायलो.

हे हारीक लागून न्युझिलॅण्डाची थेट सेमी फायनलींत सुवात मेळोवपाची संद चुकली. दुसरे वटेन इंग्लंडाच्या ह्या जैतान पाकिस्तानाची सेमी फायनलींत सुवात मेळोवपाची आस्त कायम उरली. न्युझिलॅण्डान जैता खातीर दिल्ली 160 धांवड्यांची मोख इंग्लंडान 19.3 ओव्हरींनी 6 विकेटी व्हगडावन मेळयली.

निमाणे तीन ओव्हरींनी मॅच घुंवली
इंग्लंडाक जैता खातीर अखेरच्या 18 बॉलांनी 43 धांवड्यांची गरज आशिल्ली. हांगाच्यान विल जॅक्स आनी रेहान अहमद हांणी आक्रमक रूप आपणायलें.

ग्लॅन फिलिप्साचे एकेच ओव्हरींत हे जोडयेन 2 सके आनी दोन चवक्यांचे मजतीन 22 धांवड्यो केल्यो. ते उपरांत मुखेली मिचेल सॅण्टनरान स्वता बॉलिंगेक येवन व्हड चूक केली. जॅक्स आनी रेहान हांणी ताचे ओव्हरींत 16 धांवड्यो केल्यो. अखेरचे ओव्हरींत जैता खातीर फक्त 5 धांवड्यांची गरज आशिल्ली. इंग्लंडान त्यो सहज काडल्यो. विल जॅक्सान 18 बॉलांनी 32 जाल्यार रेहान अहमदान 7 बॉलांनी 19 धांवड्यो करून नाबाद रावलो. तांचे खेरीत ​इंग्लंडा वतीन टॉम बँटनान 33, मुखेली हॅरी ब्रुकान 26, सॅम करनान 24 आनी जेकब बेथेलान 21 धांवड्यांचें योगदान दिलें.

न्युझिलॅण्डाचो डाव 159चेर आडायलो
ते पयलीं इंग्लंडाच्या स्पिनरांनी अचूक बॉलींग करून न्युझिलॅण्डाक 7 बाद 159 धांवड्यांचेर आडायलो. टॉस जिखून पयली बॅटींग करपाचो निर्णय घेतली न्युझिलॅण्डाच्या एकाय बॅट्समनाक व्हड खेळी करपाक जमली ना. ग्लॅन फिलिप्स (39), टिम सीफर्ट (35) आनी फिन ॲलन (29) हांणी उपेगी धांवड्यो केल्यो.
​​इंग्लंडा वतीन विल जॅक्स, आदिल रशीद आनी रेहान अहमद ह्या स्पिनरांनी दरेकी 2 विकेटी घेतल्यो. फास्ट बॉलरां आड धांवड्यांचो पावस पडल्या उपरांत ह्या स्पिनरांनी मदले ओव्हरींनी न्युझिलॅण्डाचे धांवगतीचेर अंकूश दवरलो. जोफ्रा आर्चरान मेडन ओव्हर घालून डावाची सुरवात केल्ली.
​सुरुवातीक फिन ॲलन आनी टिम सीफर्ट हांणी आक्रमक बॅटींग करून पावरप्लेंत बिनबाद 54 धांवड्यो केल्ल्यो. सीफर्टान जोफ्रा आर्चर आनी लियाम डॉसन हांचेर प्रतिहल्लो केल्लो. पूण, हॅरी ब्रुकान बॉल आदिल रशीदाच्या हातांत दिवन खेळूच बदल्लो. रशीदान सीफर्टाक चकयलो. जोस बटलरान ताका स्टम्प बाद केलो. अशे तरेन न्युझिलॅण्डाची पयली विकेटी पडली. ते उपरांत तांचे बॅट्समन थारावीक अंतरान बाद जायत गेले.