भांगरभूंय | प्रतिनिधी
ओली पोपाच्या शेंकड्या नेटार इंग्लंडान भारता आड चालू आशिल्ले टॅस्ट माळेंतले पयले मॅचींत पुनरागमन केलें. इंग्लंडान हांगाच्या राजीव गांधी आंतरराष्ट्रीय स्टेडियमाचेर चालू आशिल्ले टॅस्टीच्या तिसऱ्या दिसा भारता आड 126 धांवड्यांची म्हत्वाची आघाडी घेतली.
इंग्लंडान तिसऱ्या दिसाचो खेळ सोंप मेरेन आपल्या दुसऱ्या डावांत 6 विकेटी वगडावन 316 धांवड्यो केल्यात. ओली पोप 148 आनी रेहान अहमद 16 धांवड्यांचेर खेळटा.
ते पयलीं भारतान आपल्या पयल्या डावांतलो स्कोर 7 बाद 421 वयल्यान मुखार खेळपाक सुरवात केली आनी उरिल्ल्या बॅट्समनांनी 15 धांवड्यांची भर घाली अशे तरेन भारताचो डाव 436चेर सोंपलो. भारताक पयल्या डावाच्या आदाराचेर 190 धांवड्यांची आघाडी मेळिल्ली. इंग्लंडाचो पयलो डाव 246 धांवड्यांचेर सोंपिल्लो.
पयल्या डावाच्या आदाराचेर 190 धांवड्यांनी फाटीं आशिल्ल्या इंग्लंडाक दुसऱ्या डावांत 45चेर पयलो धपको बसलो. आर आश्विनाचे बॉलिंगेचेर जॅक क्रॉलेन रोहीत शर्माक कॅच दिली. क्रॉलेन 33 बॉलांनी 31 धांवड्यो केल्यो. बाद जावचे पयलीं ताणें ओपनर बेन डकेटा वांगडा 45 धांवड्यांची भागिदारी केल्ली. क्रॉले बाद जाल्या उपरांत डकेटान पोपा वांगडा मेळून डाव मुखार व्हेलो. दोगांयनी दुसरे विकेटी खातीर 68 धांवड्यांची भागिदारी केली.
फास्ट बॉलर जसप्रीत बुमरान दुसऱ्या सत्राचे दुसरे ओव्हरींत बेन डकेटाक बोल्ड केलो. आदलो मुखेली जो रुटाक 6 बॉलांनी फकत दोन धांवड्यो करप शक्य जाल्यो. 28वे ओव्हरींत बॅयरस्टोक (10) रवींद्र जडेजाचो शिकार थारलो. पूण, ओली पोपान एक बाजू सांबाळून धरिल्ली. बेन स्टोक्स वैयक्तीक स धांवड्यांचेर बोल्ड जालो. हांगाच्या बेन फोक्सान पोपा वांगडा मेळून डाव मुखार व्हेलो आनी व्हड आघाडी मेळोवपाक येस मेळयलें. दोगांयनी पंगडाचो स्कोर 190च्या वयर पावयलो. दोगांयनी 112 धांवड्यांची भागिदारी केली. फोक्स 34 धांवड्यो करून बाद जालो.
भारता वतीन जसप्रीत बुमरा आनी आर आश्विन हाणें दरेकी दोन विकेटी घेतल्यो. रवींद्र जडेजा आनी अक्षर पटेल हांकां एकेक विकेट फावो जाली.
ते पयलीं भारतान पयल्या सत्रांत बाकी आशिल्ल्यो तिनूय विकेटी वगडायल्यो. भारतान 7 बाद 421 वयल्यान मुखार खेळपाक सुरवात केल्ली. पूण उरिल्ल्या बॅट्समनांक चड धांवड्यो करपाक जमल्यो ना. पयल्या सत्रांत तीन बॅट्समनांनी 15 धांवड्यांची भर घाली. रुटान पयलीं रवींद्र जडेजाक एलबीडब्ल्यू बाद केलो. फुडल्या बॉलाचेर जसप्रती बुमराक बोल्ड करून तंबूंत धाडलो. उरिल्ले निमाणी विकेट रेहान अहमदान घेतली. ताणें अक्षर पटेलाक बोल्ड केलो. अक्षरान 44 धांवड्यो केल्यो.
इंग्लंडा वतीन जो रुटान चार विकेटी घेतल्यो. टॉम हार्टले आनी रेहान अहमद हांकां दरेकी 2 विकेटी फावो जाल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
