भांगरभूंय | प्रतिनिधी
बॉलरांचे जबरदस्त बॉलिंगे उपरांत नेट साईवर ब्रंट (नाबाद 43) आनी डॅनी व्याट हॉज (43) हांचे उत्कृश्ट बॅटिंगे नेटार इंग्लंडान बायलांचे संवसारीक टी-20 क्रिकेट सर्तीचे णववे मॅचींत दक्षीण आफ्रिका पंगडाक 7 विकेटींनी हारयलो.
125 धांवड्यांचे मोखीचो फाटलाव करपाक मैदानांत देंवपी इंग्लंडाची सुरवात सामकी सावकाश जाली. ताणें पांचवे ओव्हरी मेरेन फकत 16 धांवड्यांचेर मॅया बावचर (8) हिची विकेट व्हगडायली. ते उपरांत डॅनी व्याट हॉज हिणें एलिस कॅप्सी वांगडा मेळून डाव सांबाळ्ळो. दोगांयनी दुसरे विकेटी खातीर 34 धांवड्यांची भागिदारी केली. एन डी क्लार्कान एलिस कॅप्सीक (19) बाद करून ही जोडी फोडली. ते उपरांत बॅटिंगेक आयिल्ले नेट साईवर ब्रंटान डॅनी व्याट हॉजा बरी साथ दिली. दोगांयनी तिसरे विकेटी खातीर 64 धांवड्यांची भागिदारी केली.
डॅनी व्याट हॉजान 43 बॉलांनी 43 धांवड्यो केल्यो. जाल्यार ब्रंटान 36 बॉलांनी नाबाद 48 धांवड्यो केल्यो. इंग्लंडान 19.2 ओव्हरींनी 3 बाद 125 धांवड्यो करून जैत जोडलें.
ते पयलीं मुखेली लॉरा वोलवार्ड (42), मॅरिजान कप्प (26) आनी अनरी डर्कसन (नाबाद 20) हांकां लागून दक्षीण आफ्रिका पंगडान निर्धारीत 20 ओव्हरींनी 6 विकेटी व्हगडावन 124 धांवड्यो केल्यो.
टॉस जिखून पयलीं बॅटींग करपाचो निर्णय घेवपी दक्षीण आफ्रिकेची सुरवात बरी जाली ना. सवे ओव्हरींत तेजमीन ब्रिट्स (13) बाद जाली. ते उपरांत अन्नेका बोश हिणें मुकेली लॉरा वोलवार्ड वांगडा मेळून दुसरे विकेटी खातीर 40 धांवड्यांची भागिदारी केली. सेरा ग्लॅनान अन्नेका बोश (18) हिका बाद करून ही जोडी फोडली. पंगडाक व्हड स्कोरा वटेन व्हरपी वोलवार्डाक सोफी एकल्सटनान बोल्ड केली. तिणें 39 बॉलांनी 42 धांवड्यांची खेळी केली.
मॅरिजान कप्प हिणें 17 बॉलांनी 26 धांवड्यांचें योगदान दिलें. अनरी डर्कसन हिणें 11 बॉलांनी नाबाद 20 धांवड्यो केल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
