भांगरभूंय | प्रतिनिधी
इंग्लंड आनी भारत ह्या पंगडां मदीं चालू आशिल्ली पांचवी टॅस्ट उमळशीक वाडोवपी स्थितींत पावल्या. इंग्लंडान पयल्या डावांत व्हड आघाडी घेवपाची संद व्हगडायली जाल्यार पयल्या डावांत गडगडपी भारतान दुसऱ्या डावांत जबरदस्त खेळ केलो.
भारतान आपल्या दुसऱ्या डावांत 396 धांवड्यो करून इंग्लंडाक जैता खातीर 374 धांवड्यांची मोख दिली. यशस्वी जयस्वालाच्या शेंकड्याक, आकाश दीप, वॉशिंग्टन सुंदर आनी रवींद्र जडेजा हांच्या अर्द शेंकड्यांची साथ मेळ्ळी. इंग्लंडा मुखार खर आव्हान उबें करपाक भारताक येस आयलें.
लोकेश राहुल (7), साई सुदर्शन (11), शुभमन गिल (11) आनी करुण नायर (17) सवाय भितर तंबूंत परतल्या उपरांत संकश्टांत सांपडिल्ल्या भारताक यशस्वीन सांबाळ्ळो. ताणें पयलीं आकाश दीप हाच्या वांगडा 150 बॉलांनी 107 धांवड्यांची भागिदारी करून भारतीय पंगडांत सकारात्मक वातावरण निर्माण केलें. सकयले सुवाते वयल्या बॅट्समनांनी ताका बरी साथ दिली. यशस्वीन 164 बॉलांनी 118 धांवड्यो केल्यो. ताणें 14 चवके आनी 2 सके मारले. यशस्वीन करुणा वांगडा 40 आनी जडेजा वांगडा 44 धांवड्यांची भागिदारी केली. तो बाद जाल्या उपरांत जडेजा आनी ध्रुव जुरेल हांणी 72 बॉलांनी 50 धांवड्यांची भागिदारी केली.
ध्रुव 46 बॉलांनी 34 धांवड्यो करून बाद जालो. जडेजान अर्द शेंकड्याची खेळी करतना प्रतिस्पर्धी बॉलरांक घाम काडलो. अखेरेक जोश टंग हाणें ताका बाद केलो. जडेजान 77 बॉलांनी पांच चवक्यां सयत 53 धांवड्यो करून बाद जालो. इंग्लंडांत सगल्यांत चड टॅस्ट धांवड्यो करपाचे भारताचे वळेरेंत ताणें तिसरी सुवात मेळयली. ताणें 1158 धांवड्यां सयत सुनील गावस्कराक (1152) फाटीं घालो. हे वळेरेंत सचिन तेंडुलकर (1575) पयले सुवातेर आनी राहुल द्रविड (1376) दुसरे सुवातेर आसा.
रवींद्र जडेजान हे माळेंत अजून मेरेन 516 धांवड्यो केल्यात आनी 7 विकेटी घेतल्यात. विनू मांकड हांणी 1955त न्युझिलॅण्डा आडचे माळेंत 526 धांवड्यो आनी 12 विकेटी घेतिल्ल्यो.
ओव्हल मैदानांत चवथ्या डावांत 263 धांवड्यांचो येसस्वी फाटलाव केला. 1902तले अॅशेस माळेंत इंग्लंडान ऑस्ट्रेलिये आड ही मोख मेळयिल्ली. 2024त श्रीलंकेन 219 धांवड्यांचो येसस्वी रितीन फाटलाव केल्लो.
मजगतीं, वॉशिंग्टन सुंदरान 39 बॉलांनी अर्द शेंकडो पूर्ण केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
