भांगरभूंय | प्रतिनिधी
नेट सायवर ब्रंट हिच्या अश्टतासांच्या प्रदर्शना नेटार इंग्लंडाच्या बायलांच्या पंगडान तिसरे आनी निमाणे वन डे मॅचींत पाकिस्तानाच्या बायलांच्या पंगडाक 178 अशा व्हड धांवड्यांनी हारोवन माळ 2-0 अशी जिखली.
कावण्टी मैदानाचेर इंग्लंडान पयलीं बॅटींग करतना निर्धारीत 50 ओव्हरींनी 5 विकेटी व्हगडावन 302 धांवड्यो केल्यो. ताची सुरवात बरी जाली ना. आठवे ओव्हरींत ओपनर टॅमी बोमॉण्ट (11) बाद जाली. ते उपरांत 11वे ओव्हरींत माया बुशेर (34) लेगीत बाद जावन तंबूंत परतली. तिसरे विकेटीच्या रुपान मुखेली हैदर नायट (12) धांवड्यो करून बाद जाली. ते उपरांत नेट सायवर ब्रंट आनी डॅनिएल वायट हांणी डाल सांबाळ्ळो. नेट सायवर ब्रंटान नाबाद 124 धांवड्यांची खेळी केली. जाल्यार डॅनिएल वायट हिणें 44, एमी जोन्सान 27 धांवड्यो केल्यो. एलिस कॅप्सीन नाबाद 39 धांवड्यांची खेळी केली.
पाकिस्ताना वतीन उम्मे हानीन दोन विकेटी घेतल्यो. डायना बेग, निदा डार आनी फातिमा सना हांकां एकेक विकेट फावो जाली.
ते उपरांत इंग्लंडाच्या बॉलरांनी उत्कृश्ट प्रदर्शन केलें. तांणी पाकिस्तानाचो डाव 29.1 ओव्हरींनी 124चेर सोंपयलो. पाकिस्तानाची लेगीत सुरवात बाबत जाली. स बॅटरांक दोट्टी आंकडो लेगीत हुपपाक जमलो ना. मुखेली निदा डार दुखापतीक लागून बॅटींग करपाक आयली ना. इंग्लंडा वतीन सोफी एकल्सटनान तीन विकेटी घेतल्यो. नेट सायवर ब्रंटान आनी लॉरेन बेल हांणी दरेकी दोन विकेटी मेळयल्यो. शार्लेट डीन आनी केट क्रॉस हांकां एकेक विकेट फावो जाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
