भांगरभूंय | प्रतिनिधी
गस अॅटकिंसनाची घातक बॉलींग आनी जॅक क्रॉले (76), जेमी स्मिथ (70) हांच्या उत्कृश्ट बॅटिंगे नेटार येजमान इंग्लंडान पयले टॅस्टींत वॅस्ट इंडीज पंगडाक डाव आनी 114 हारयलो.
पदार्पणाची मॅच खेळपी अॅटकिंसनान वट्ट 12 विकेटी घेतल्यो. वॅस्ट इंडिजाचो पयलो डाव फकत 121 धांवड्यांचेर सोंपिल्लो. जाल्यार दुसऱ्या डावांत लेगीत ताका बरी सुरवात करपाक जमली ना. ताचो दुसरो डाव 136चेर सोंपलो. दुसऱ्या दिसाचो खेळ सोंपिल्लो त्या वेळार ताणें 79 धांवड्यांचेर 6 विकेटी व्हगडायिल्ल्यो.
मजगतीं, इंग्लंडाचो फास्ट बॉलर जेम्स अॅण्डरसनाची ही निमाणी टॅस्ट आशिल्ली. 41 वर्सां पिरायेच्या अॅण्डरसनान 2002त 20 वर्सां पिरायेचेर आंतरराष्ट्रीय क्रिकेटीक सुरवात केल्ली. ताणें टॅस्टींत 704, वन डेंत 269 आनी टी-20त 18 अशो मेळून वट्ट 991 विकेटी घेतल्यात.
705वी विकेट मेळूंक नाशिल्ल्याचें दुख्खः अॅण्डरसन
फास्ट बॉलर जेम्स अॅण्डरसनान आपलेच बॉलिंगेचेर गुडाकेश मोतीची कॅच सोडली. ताका लागून अॅण्डरसनाक 705वी विकेट पुर्ण करपाक अपेस आयलें. मॅच सोंपल्या उपरांत पत्रकारां कडेन उलयतना अॅण्डरसनान सांगलें, आपल्याक अजून ती कॅच सोंडिल्ल्याचें दुख्ख आसा. पूण, आपले खातीर हो सप्तक बरो गेलो अशें ताणें म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
