भांगरभूंय | प्रतिनिधी
पणजीः भलायकी मंत्री विश्वजीत राणे हांणी गोमॅकॉंतल्या डॉ. रुद्रेश कुट्टीकार हांचे कडले वायट वागणुके वेल्यान राज्यांतल्या दोतोरांनी आंदोलन केल्लें आसतनाच हो विशय आतां राष्ट्रीय आनी आंतरराष्ट्रीय पांवड्यारूय पावला. इंग्लंडचे गॅस्ट्रोएन्टेरोलॉजिस्ट डॉ. किथ सियाउ हांणी डॉ. रुद्रेश कुट्टीकार हांकां आपले वांगडा इंग्लंडाक वैजकी सेवा दिवचे खातीर येवचें असो प्रस्ताव दिला. हे विशीं तांणी केल्लें ट्वीट सध्या व्हायरल जाता.
सध्या व्हायरल जावपी त्या फोटोंत इंग्लंडचे गॅस्ट्रोएन्टेरोलॉजिस्ट डॉ. किथ सियाउ हांणी डॉ. कुट्टीकार हांकां आपले वांगडा इंग्लंडाक वैजकी सेवा दिवपाक येवपाचो प्रस्ताव दिला. तशेंच त्या प्रस्तावाक तेंको दीत गोंयचे हेल्थ कोच डॉ. अंशुल हांणी ’डॉ. रुद्रेश हांणी ही संद स्वीकारची, आनी आपल्या कामाची कदर करपी देशांत सेवा दिवची’, असो त्या ट्विटाक रिप्लाय केलो.
मजगतीं गोमॅकॉंतल्या त्या प्रकरणाचेर सोमारा आंदोलन केल्ल्या डॉक्टरांची भेट घेवन तांकां आंदोलन बंद करपाचो सल्लो मुख्यमंत्री डॉ. प्रमोद सावंत हांणी दिलो. आंदोलक डॉक्टरांच्यो मागण्यो बेगोबेग मान्य करपा वांगडा, गोमॅकॉंत असले प्रकार परत घडचे न्हय म्हणून शिस्तपालन समितीची स्थापना करपाचो निर्णय मुख्यमंत्र्यांनी घेतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
