भांगरभूंय | प्रतिनिधी
फुटबाॅला भितर देशाचें नांव वयर काडपी खेळगडो सुनील छेत्रीन हालींच जाहीर केली. ती ह्या सप्तकांतली म्हत्वाची घडामोड. हालींच फोंड्यां अभिनयाची कार्यशाळा जाली. तिका बरो प्रतिसाद मेळ्ळो. नाटक, टीव्ही माळ जावं वा सिनेमा तातूंत संगीत हें आसपाकूच जाय. ताका लागून कलाकृतीक एक वेगळी रंगत येता. हरशी पसून आमी संगीत आयकतात, तेन्ना आमचो मूड सुदारता. हो दरेकल्याचो अणभव. ताकाच लागून म्युझिक थेरपी जल्माक आयल्या आसुये. ती तुमकां आॅनलायन पद्दतीन कोणे शिकयली जाल्यार कशें? ताची म्हायती ह्या लेखा वरवीं दिवपाचो हो यत्न. जर तुमकां हे पद्दतीन येश मेळ्ळें जाल्यार तुमी हातूंत फुडलें पावल मारपाक शकतात.
म्युझिक थेरपी म्हणल्यार संगीतांतल्यान दुयेंसां बरीं करप. संतोष घाटपांडे हे चार्टर्ड अकावंटंट कंपनी सेक्रेटरी. कामा निमतान विदेशांत वतना तांकां ह्या संगीत उपचाराची म्हायती मेळ्ळी आनी तांणी स्वता ताचें प्रशिक्षण घेतलें. हें शिक्षण भारतांत हाडपाचें निश्चित केलें. तांच्या कामाची तोखणाय जाली. तांकां राष्ट्रीय पुरस्कारुय फावो जालो. संगीत आयकतकच मनशाच्या मनांत मूड बदलपी लहरी वतात आनी आमकां बरें दिसता. 24 वरां थांबनासतना काम करपी आमच्या मेंदवांतलीं 17 केंद्रां संगीत खंय जागृत करता, असो एक अभ्यास सांगता. ही कार्यशाळा खंयच्याय उमेदवारां खातीर आसली तरी जांकां संगीताची आवड आसा,
अभ्यास आसा वा जे संगीत शिकतात तांकां चड बरी आवडूं येता. जे घरा कडेन आसतात, जांकां संगीताची तांत्रिक म्हायती आसा, तांणी लेगीत हे कार्यशाळेंत वांटेकार जावं येता. ह्या विशयांत जे करियर करपाक सोदतात, तांकां मात संगीताचो अभ्यास करूनच ह्या फांट्यांत येवचें पडटलें हें वेगळें सांगपाक नाका. ज्येश्ठ नागरिकांक झेम पडना, आर्थ्रायटिस आसता. तांकां ही थेरपी बऱ्याक पडटा, असो अणभव आसा. कॅन्सरा सारक्या दुयेंसां मदींय पेन मॅनेजमेंटात हे थेरपीचो लाव जाता. केमोथेरपी सारक्या उपचारा मदीं ही थेरपी बरें काम करता. केमो उणो लागूं शकता, अशें तज्ञांचें मत.
खंयच्या दुयेंसाक खंयचें संगीत बरें हें तुमकां हे कार्यशाळेंत कळूं शकता. 4 जुनाच्यान ही कार्यशाळा सुरू जातली. (अनाहत संगीत थेरपी- फोन – 8010891765). खाशेली गजाल म्हणल्यार हे कार्यशाळेची फी तुमी हप्त्यांनीय भरूं शकतात. तांची वेबसायट आसा. www.anahatmusictherapy.com तातूंत तुमकां संगिताचो जादू कळपाक मजत जावं येता. देड हजारां वयर लोकांनी तिचो लाव घेतला. जे संगीत उपचाराचो वापर करतात, तांकां घाटपांडे सरांचें मार्गदर्शन मेळटा. तशी मजत ते वर्सभर करतात.
हे थेरपीचो फायदो म्हणल्यार ताचे सायड इफेक्ट नात. घाटपांडे हांची घरकान्न सौ. सावनी हीय आॅनलायन संगीत शिकयता. त्या वर्गाचें नांव स्वानंद आसा. नांवा प्रमाण तुमकां आनंद दिवपी संगीत. तशेंच हे थेरपी वरवीं तुमी दुसऱ्यांचो रोग लेगीत पयस करपाक शकतात. निवृत्तीच्या काळांत तर संगीताचो तुमका उपेग जाता, ही लेगीत थेरपीच न्हय? साबार जाणांनी हें शिकून लोकांचेर उपचार लेगीत केल्या. तांचो संस्थेन भोवमान केला. हाॅस्पिटलांनी काम करपी, शाळा, म्हाविद्यालया, मानसशास्त्रज्ञ हांचे खातीर ही कार्यशाळा उपेगी थारूं शकता. अभ्यासाचो एक वेगळो फांटो म्हूण तुमी विचार करूं शकतात.
प्रा रामदास केळकार
9822583275
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
