भांगरभूंय | प्रतिनिधी
हें युग म्हायती- तंत्रज्ञानाचें. कांय जाणांक ताचो दुस्वास. ताका लागून जावपी लुकसाण, भलायकेच्या समस्यांचेर कांय जाण बोट दवरतात. पूण, कितेंय आसलें तरी तंत्रज्ञाना मुखार समेस्त मनीसजातीक दिमी मारपा बगर आयज दुसरो पर्याय उरूंक ना. अर्थांत तंत्रज्ञान आमचेर नियंत्रण मेळोवचें ना इतली जतनाय आमकां घेवची पडटली. ह्या म्हायती तंत्रज्ञानाचे मजतीन आमी आमची सर्वांगी उदरगत सादपाक जाय. आमचें कश्ट, वेळ वाटावपाचो यत्न करपाक जाय. तंत्रज्ञान आमचे खातीर, आमी तंत्रज्ञाना खातीर न्हय, हाची जाणीवूय आमी सगल्यांनी सदांच दवरपाची गरज आसा. भारतांत लागीं- लागीं दरेकल्याच्या हातांत मोबायल फोन आसा. ताचेर इंटरनेट सुविधा आसा. म्हणटकच आॅनलायन वेव्हार सगल्यांनी शिकून घेवचे. ते करतना सादूर मात रावचें. नाजाल्यार बँक खातें रिकामी जातलें!
गोंयांतल्या पंचायतींनी आतां आनीक णव सेवा आॅनलायन मेळटल्यो. ताका लागून सगल्यांक घरांत बसून पंचायतींतलीं कामां करपाक मेळटलीं. अर्ज करपाक मेळटले, जाय ते दाखलेय घेवपाक मेळटले. ते खातीर आॅनलायन पयशे भरले काय काम जालें. सध्या पंचायती, पालिका कांय सेवा आॅनलायन दितात, मात तांचो लाव घेवपी खूब उणे. कारण बऱ्याच लोकांची म्हयन्यांतल्यान एक फावट तरी पंचायत, पालिकेंत फावट आसता. बाजार, मुखेल रस्त्याचेर ह्यो स्वराज संस्था आसत जाल्यार सदांच पसून थंय वचपाक मेळटा. ताका लागून बरेच लोक आॅनलायन सेवा वापरिनात. पंचायतूच न्हय, तर लायट, उदकाचीं बिलां पसून लोक संबंदीत खात्याच्या कार्यालयांत वा पतसंस्थांनी भरतात. आॅनलायन तोपी घालपाचे प्रकार वाडल्यात, हें ताचें फाटलें कारण आसतलें. सगल्यांत म्हत्वांचें म्हणल्यार ह्यो सेवा चलपाक जाय. कारण मुळांत गोंयच्या बऱ्याच वाठारांनी मोबायल फोनाक नेटवर्क मेळना. सगळो अर्ज, दाखलो आॅनलायन भरलो आनी निमणो तो सादर करपाच्या वेळार नेटवर्क अचकीत बंद जाता वा त्या अर्जांतूच फाॅल्ट आसता….. ह्या सगल्यांचेर सरकारी यंत्रणांक उपाय सोदचो पडटलो. तेन्नाच चडांत चड लोक आॅनलायन सेवां कडेन वळटले. फुडल्या पांच वर्सां भितर पेपरलेस वेव्हार करतलो जाल्यार सरकारी कार्यालयां, बँको, एलआयसींतूय आॅनलायन वेव्हार जावंक जाय.
पंचायतींत हाचे मुखार बांदकाम परवानो अर्ज, वेपारी परवानो, जायराती लावपा खातीरचे अर्ज, जल्मदाखलो, मरणाचो दाखलो, रहिवाशी दाखलो, उत्पन्नाचो दाखल इतलेंच न्हय तर नळ, लायटीचें कनेक्शन घेवपाचे अर्जूय आॅनलायन मेळटले. ह्या निर्णयाक येवकार दिवचो पडटलो. हे वा हेर कसलेय सरकारी अर्ज, दाखले जाय जाल्यार कचेरेंत उण्योच तीन फावटी मारच्योच पडटात. कांय वेळार संबंदीत कर्मचारी तुमकां तें स्वता घरा वा वाटेर हाडून दिता. तो अशें कित्याक करता, हें वेगळें सांगपाक नाका. आॅनलायन सुविधा सारकी चलत जाल्यार लोकांक फावटी मारच्यो पडच्यो नात. तांचो वेळ आनी पयसो वांचतलो आनी सगल्यांत म्हत्वाचें म्हणल्यार भ्रश्टाचाराचेर नियंत्रण येतलें. लोकांचो, पर्यायान राज्याचो पयसो भलत्यांच्या बोल्सांत वच्चो ना.
कांय वर्सां पयलीं मुख्यमंत्री डाॅ. प्रमोद सावंत हांणी आॅनलायन कारभाराची घोशणा केल्ली. कांय सेवा आॅनलायन जाल्योय बी. पूण, आतां लोकांचो चड संबंद येता, त्यो सेवाय आॅनलायन जातात. ह्योच न्हय, तर चडांत चड लोकांचो संबंद येता, त्यो सगल्योच सेवा आॅनलायन करपाक सरकारान पावलां उखलूंक फावो. तांचो लाव घेतना नागरिकांक कसलीच आडखळ मात येवपाक जायना. वीज आनी उदकाचें बील आॅनलायन भरपाक मेळटा, तशे आरटीओ, बांदकाम खातें, पालिका हांचे शक्य तितले वेव्हार आॅनलायन जावंक जाय. आतां तालांव पसून आॅनलायन जाल्यात. पयशे भरपाचे जे- जे म्हूण वेव्हार आसात, ते आॅनलायन जावचे. कांय सरकारी अर्ज संबंदीत कार्यालयांत मेळनात, ते सकयल वा कुशीक आशिल्ल्या फोटो प्रती मारपी (झेराॅक्स) दुकानांनी मेळटात, हाचे फाटलें कारण कितें? कांय कचेऱ्यांनी भायले मनीस थंय येवप्यांचीं सगलीं कामां करून दितात. तांकां एजंट म्हणटात. ह्या एजंटांक सरकारी नोकरीच कित्याक दिवची न्हय? प्रत्येक कचेरेंत एजंट नेमल्यार लोकांक ताका च्यावेक पयशे दिवपाची गरज पडची ना.
सरकारान पांवड्या पांवड्यान पुराय सरकारी कारभारूच आॅनलायन करचो. कारण काळाची ती गरज. काळूय बदलत आसा. म्हणटकच आमकांय बदलचें पडटलें. पोरणे कितलेंय बरें आसलें तरी सुवार्था खातीर ताका वेंग मारून रावप समा न्हय.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
