भांगरभूंय | प्रतिनिधी
नवी दिल्ली, खबरां संस्थाः लोकांचो जिणेचो दर्जो दिसानदीस बदलत आसा. ह्या बदलपी जिणे पद्दतीचो भलायकेचेर वायट परिणाम जाता अशें दिसता. एका अहवाला प्रमाण वट्ट दुयेंसांतले 56.4 टक्के दुयेंस हें आहाराक लागून जातात. इंडियन काउन्सिल ऑफ मेडिकल रिसर्च (Indian Council of Medical Research) हांणी हे संबंदी मार्गदर्शक तत्वां जारी केल्यांत.
इंडियन काउन्सिल ऑफ मेडिकल रिसर्च (आयसीएमआर) आनी नॅशनल इन्स्टिट्यूट ऑफ न्युट्रीशन (एनआयएन) हांच्या म्हणण्या प्रमाण चुकीचे खावपाचे संवयेक लागून भारतांत लठ्ठपणाची समस्या वाडत आसा.
मोटसाण आनी गोडेंमूताच्या लक्षणांचो धोको वाडटा
मजगतीं, आयसीएमआरान निरोगी आहार घेवपा खातीर कांय मार्गदर्शक तत्वां जारी केल्यांत. मोटसाण (लठ्ठपणा) आनी गोडेंमूत अशें वेगवेगळे दुयेंस (एनसीडी) आडावपा खातीर आहार मार्गदर्शक तत्वां जारी केल्यांत. व्हड प्रमाणांत भुरगीं कुपोशणाक लागून त्रासांत आसात. ते भायर चड वजन, लठ्ठपणा आनी गोडेंमूत लक्षणांचो धोको जायत्या राज्यांनी वाडत आसा. साकर आनी मीठ आशिल्ल्या खाणांचे प्रमाण वाडत आसा. हे पदार्थ सहज मेळटात. ह्या पदार्थाचे चड सेवन जाल्ल्यान दुयेसांचो आंकडो वाडत आसा.
मीठ, तेल उणें खावप, व्यायाम करप गरजेचें
नॅशनल इन्स्टिट्यूट ऑफ न्युट्रीशन (NIN) हे संस्थेन दिल्ले म्हायती प्रमाण मीठ उणें खावप, तेल उणें खावप, व्यायाम करप गरजेचें आसा. तशेंच साकर उणी आनी चड प्रक्रिया केल्लीं खाणां चड खावची न्हय. लठ्ठपणा आडावपाक निरोगी खाणां खावप गरजेचें. पोशक अन्न सेवन करप गरजेचें आसा. आहारांतल्या सवयींत म्हत्वाचे बदल जाल्यात. हाका लागून दुयेंस वाडल्यात. आहारा संबंदीं योग्य संवय आपणावप गरजेचें.
आहारांत कडधान्य, फळां, भाजीपालो आसप गरजेचें
5 ते 9 वर्सां पिरायेच्या 34 टक्के भुरग्यांक ट्रायग्लिसराइड्सचो त्रास जाता. समतोल आहारांत ज्वारी, बाजरी, भरड धान्य (millets) आनी कडधान्याचो उपेग करप गरजेचें आसा. काजू, भाजी, फळां आनी दूद खावंक जाय. पोशक तत्वांचें उणें सेवन जाता ते सेवन वाडोवप गरजेचें आसता.
तुमचे जेवणाचे ताट कशे आसूंक जाय?
समतोल आहारांत 45 टक्क्यां परस चड कॅलरीज आसूंक फावना. 15 टक्के कॅलरीज कडधान्य, बीन्स आनी मटणांतल्यान मेळपाक जाय. भाजीपालो, फळां आनी पाचव्या पानांची भाजी चड खावपाची गरज आसा. आनिकूय एक मुखेल भाग म्हळ्यार धान्य आनी बाजरी. दाळ, मांस, तांतयां, सुकीं फळां खावप आनी दूद पिवप गरजेचें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
