आस कशीच सोंपना

भांगरभूंय | प्रतिनिधी

मनशा मदीं जेन्ना आस उबी जाता तेन्नाच आसगांव प्रकरण घडटा. तेल कोणाचें, पीठ कोणाचें आनी वडे कोण काडटात पळेयात.

पोरणें गोंय आनी थंयचो नवो ताल्ल बंगल्याचो आतां सगल्यांक विसर पडला आसूंक जाय. उपास जाले, मोर्चा जाले, आंदोलन जालें, पदयात्रा जाली आनी उपरांत सगलें थंड थंड जालें. सगलेच विसरले ती गजाल. मोडात मोडात तो बंगलो म्हूण जाय ते जाण आड्डले. वेंचणुके वांगडाच सगले थंडावलें आनी अजून मेरेन तो बंगलो दिमाखांत उबो आसा. आतां लोकांक नव्या बंगल्याचो विशय मेळ्ळा. आसगांवचो बंगलो. येन्ना मेरेन गोंयांत आसगांव नांवांचो एक गांव आसा म्हणपाची खबर संवसारभर जाल्या आसूंक जाय. देशांतल्या कितले तरी उद्देगपती ह्या गांवांत आनीक खंय जागे बी आसात काय हाचे चवकशेक लागल्यात आसतले. हांगासरलें पर्यटन जायते पटिनीं वाडटलें हातूंत दुबाव ना. हो अर्दो मोडिल्लो बंगलो पळोवंकूच जायते जाण
गोंयांत येतले.
अर्दुकुटो मोडिल्लो आसगांवचो बंगलो आनी कितलो तेंप आयज मोडटा फाल्यां मोडटा करून गाजिल्लो आनी अजून उबो आशिल्लो पोरणे गोंयचो बंगलो पर्यटन वाडोवपाचे नदरेन उपयोगाचे थारूंक शकता. सरकारान हाचेर जरूर विचार करचो. निमाणें कशेंय करून पर्यटनाक चालना मेळटकूच जाली. पर्यटक तरी कितलो तेंप त्योच दर्या वेळो आनी देवळां वा इगर्जो पळेतले? तांकांय म्हणून नवें कितें तरी जायच न्ही? भायल्या देशांनी पर्यटकांक भूत बंगले बी दाखोवंक व्हरतात खंय आनी पर्यटकूय घोस्तान तें पळोवंक वतात. आमच्यांनी डिस्प्युटेड प्रोपर्टीज दाखोवपाचें पर्यटन सुरू करूं येता. खूब जागे मेळटले पूण सुरवेक हेच गाजिल्ले दाखोवंक येता.
हें सगलें घडटा कित्याक? जाग्यां खातीर वा घरां खातीर वाद कित्याक जातात? हाची जाप म्हणल्यार आस. ही आस फकत आसगांवांतूच आसा अशें न्हय तर पुराय गोंयांत ही आस आसा. म्हणुनूच तर कोणाचेय जागे फटींगपणां करून विकपाचीं प्रकरणां हांगा घडटात. दर एकलो म्हाका कितें मेळटलें ह्याच विचारांत आसता. कोणाचेय जमनींत पांय दिलो तर ती पावलभर जमीन आपणाक मेळची अशें दिसता ताका. नासल्यार दुसरो कितेंय करूंक गेलो म्हणजे तातूंत जाता तशीं आडमेळीं हाडपाचें काम
सुरू जाता.
एक काळ आशिल्लो जेन्ना मनशाक उतर आसलें. मनीस दिल्लें उतर सांबाळपाचो यत्न करतालो. कोणूय आपणालें घर सहजतायेन दुसऱ्याक वापरूंक दितालो. आपणांक जाय तेन्ना तें परतें मेळटलें हाची खात्री आसताली. पूण आयज उतर कित्याक कागदाक व्हालोर उरूंक ना. सामको स्टँप पेपराचेर केल्ल्या एग्रिमेंटाक कोण मानिनात. आयज कोणाकूय जर आपल्या जाग्यांत मात्सो शिरकाव करूंक दिलो तर तो हातांतल्यान गेल्ल्यातूच जमा. हाकाच लागून आयज गोंयांत कितलिंशींच घरां बंद आसात पूण ते कोणाक भाड्याक दिवंक वचनात. कोण घेवन बसतलो त्यो कटकटी उपरांत.
आयज जर कोणाकूय रावपाक घर दिलें आनी कांय तेंपान जर ताका थंयसून भायर सरूंक सांगलें तर घरांत रावपी म्हणटलो, म्हजी रावपाची पयलीं वेवस्था कर आनी मागीरूच भायर सर म्हणून सांग. जसो कितें ताचो भार घर दितल्याच्या माथ्यार आसा. देखीक ही साश्टींतलीच खबर घेवया. एका भाटकाराच्या भाटांत एक लॉज आसलें. पाडले उपरांत भाटांतले नाल्ल भरूंक ताचो वापर जातालो. उपरांत लॉज रिकामेंच उरूंक लागलें. एक दीस एकलो भाटकारा कडेन काकुटेक येवन आपणांक थंय रावंक दी म्हणून मागूंक लागलो. तूं सांगता तेन्ना आपूण भायर सरतलों म्हणपाचें उतरूय ताणें दिलें. भाटकारान काकुटेक येवन ताका रावंक दिलें. भाटकाराक दिशिल्लें भाटांत इल्ली जाग उरतली. चोर बी येवंक पावचे ना. पूण जालें भलतेंच. माडांक नाल्लूच उरना जाले. भाटकारान जायते उपाय करून पळेले आनी निमाणें निर्शेवन म्हणटात तशें भाट एका बिल्डराक विकलें.
बिल्डरान त्या लॉजांत रावतल्याक आपणें हें भाट घेतलां म्हणपाचें सांगलें. आनी तें लॉज सोडून वचचे खातीर ताका कितें जाय तें मागूंक सांगलें. ते भायर ताका सांगलें आपूण बांदतां ती बिल्डींग जातकूच ताका इतलोच म्हणल्यार लॉजा इतलो म्हणल्यार सुमार पंच्याण्णव मिटरांचो फ्लॅट दितां. ते भायर बिल्डींग उबी जायसर तो रावतलो त्या जाग्याचें भाडें दितां. तर हाणें बिल्डराक कितें सांगचें? आपणांक स पूत आनी दोन धुवो सय पुतांक एकेक फ्लेट आनी दोनूय धुवांक रोख दुडू दी तरूच आपूण हांगच्यान भायर सरतां. बिल्डरान तकलेर हात मारलो आनी म्हणलें हांव त्या देवाचे उपकार मानतां ताणें धृतराष्ट्राक परतो जल्माक घालो
ना म्हणून.
प्रकरण कोर्टांत आसा आनी दोगूय तारखो घेतात हें वेगळें सांगपाची गरज ना. मनशा मदीं जेन्ना आस उबी जाता तेन्नाच आसगांव प्रकरण घडटा. तेल कोणाचें, पीठ कोणाचें आनी वडे कोण काडटात पळेयात. घरमालक जेन्ना घर विकूंक सोदता म्हणपाचें कळटा तेन्नाच तें घर थंय घरांत रावतल्यांनी कित्याक घेतलें ना? घर विकतें घेनासतना घरपटी कशी नांवार जाली? ह्या प्रकरणांत जायते जाणांक धरल्यात, घर विकतें घेतल्याक समन्स धाडलां पूण जाणें घर विकलें त्या मूळ मालकाक कोणेच कितेंय विचारलां म्हणपाचें आयकूंक ना. म्युटेशन करपी तलाठी वा ताच्या ऑफिसाक कोणेच प्रश्न करूंक ना. आनी पयरूच जाल्ले ग्रामसभेंत तर घर नंबरूच बोगस म्हणपाचो आरोप जाला. आमची आस वचची ना तो मेरेन असलीं आसगांव प्रकरणां घडत रावतलीं. म्हाका एकूच प्रश्न पडटा आमी आमच्या भुरग्यां खातीर कितें तरी दवरतले मूं काय तांकां गोंय म्हणून आमच्या जाणट्यांचें कितें तरी आसलें म्हणपाचें इतिहासांत वाचचें पडटलें?

अभयकुमार वेलिंगकार
9423884687