भांगरभूंय | प्रतिनिधी
कांय गजालींनी बदल असो घडटा की तो जिवितातले सुख कशें जाणवता. पयलींचो काळ, आजी- पणजेचो आसलो. जेन्ना बायलां फकत रांदची कुड, शेतां- भाटां, धालांचो मांड ह्या जाग्यांचेर आसतालीं. बायलांक घरांतलें पावल भायर काडून खंय वचपाक लेगीत फुरसत नासली. कांय जाणांक घरांतलीं खंय वचपाकुय दिनासलीं. त्या वेळार बायलांनी किदें करप, खंय वचप म्हणल्यार एक चूक कशी. जाण्ट्यांचे विचार वेगळ्या तरेचे आसले. बायलांनी चड उलोवप ना, लोकां मदी चड मेळून मिसळून रावप ना.. ह्या विचारांनी बायलांक फुडें सरपाक मेळनासले. कलेच्या बाबतीन पळोवचे जालें जाल्यार नाच करप, नाटकां करप म्हणल्यार तांकां वेगळ्या दृश्टिकोनांतल्यान लोक पळयताले. नाच, नाटकां केल्ल्या बायलांक ‘नटी’ लेगीत म्हण्टाले. काय लोकांचे विचार अजुनूय अशेच आसात. नाटक करप, नाचप ही एक ‘कला’ ह्या शब्दाचो अर्थ अजुनूय काय जाणांक समजना वा समजून घेवपाचो यत्न करिनात अशें म्हणू येता. दादलो मनीस नाटकांनी काम करता जाल्यार ती कला आनी बायल मनीस फुडें सरता जाल्यार ती कला न्हय, अशें कित्याक? हाचेर विचार करून पळयात, प्रत्येक कला ही कलाच आसता. फुडें सरतल्याक नाऊमेद करचो न्हय. कला ही देवान दिल्ली देणगी कशी. तिका जपुन दवरपाक जाय, तिचो मान राखपाक जाय, कलेन फुडें सरतल्या प्रत्येक अस्तुरेक नटी म्हणीनासतना तिका सम्मान दिवपाक जाय.
खोस एकेच गजालीची जाता, ती म्हणल्यार आतां बायलां आपूण जावन फुडें सरतात. धालो, नाच, फुगडी, संगीत, नाटकां अश्या खुपश्या सर्तींनी वांटेकार जातात. स्वता खातीर स्वता जावन उबीं रावतात. भांगराळ्या ह्या म्हज्या गोंयान जन्मल्ले प्रत्येक अस्तुरेक सलाम! आयज बायला माचयेर उमेदीन नाचतना, खेळटना दिश्टी पडटात तें पळोवन प्रत्येक नवे अस्तुरेच्या मनान आपुणूय वांटेकार जावचें, सर्तींनी फुडें सरचें अशी आस निर्माण जाता. हें पळोवन खूब बरें दिसता.
येता त्या 7 जुलयाक ‘श्री म्हात्राई काळभैरव महिला नाट्य मंडळ, लामगांव- दिवचल’ हो ग्रुप पयले फावट बायलांचो असो तिकिट शो घेवन येता. महेश चंद्रकांत नायक लिखित आनी नितीन शिवराम नायक हांणी दिग्दर्शित केल्ले ‘आस्त बाळगीतां बाळगीतां’ हें बायलांचें कोंकणी नाटक 7 जुलयाक सांजे साडेसातांक सांखळेच्या रवींद्र भवनां सादर जातलें. सगळ्यांनी हाजिरी लावन तांची उर्बा वाडोवची. तांकां तेंको दिवचो. ह्या नाटकान इनामां लेगीत जोडल्यांत. सुखान आनी दुख्खान मनीस कसो जगता, दुख्खी आसूनुय कसो सुखी रावता? एके बायलेची, सुनेची, चलयेची, आवयची अवस्था दिश्टी पडटा. खुपश्यो गजाली शिकपा सारक्यो आसात. बायलांनी बायलांक मुद्दम जावन तेंको दिवपाक येवचें. नाटकाच्या माध्यमांतल्यान बायलां आपली कला लोकां मरेन पावोवपाचो यत्न करतात. तांच्या ह्या प्रयत्नांक आमच्या उपस्थितीन यश मेळोवन दिवया. गोंयान बायलांचो तिकेट शो अशें हें पयलें कोंकणी नाटक, हें आयकुन वेगळेंच सुख गावता. त्या सुखाचो आमी नाटकाक वचून प्रत्यक्षान आस्वाद घेवया. तेंगशी गांठपाचें बायलांचें पावल गोंयांत माचयेर फुडें सरता, तांकां आनीकुय फुडें व्हरपाचो यत्न करूया. सगळ्यांनी मुजरत येवचें.
सिंधिया सोनू पार्सेकार
8788477510
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
