भांगरभूंय | प्रतिनिधी
हैद्रबाद, खबरां संस्था : टोरोंटो जाल्ल्या दक्षीण आशियाई आंतरराष्ट्रीय चित्रपट महोत्सवांत आंतरराष्ट्रीय पांवड्यार दोन पुरस्कार फावो जाल्ल्या ‘आसेसांव’ ह्या कोंकणी चित्रपटाक १९ डिसेंबर सावन सुरू जावपी हैद्राबाद आंतरराष्ट्रीय लघुपट चित्रपट महोत्सवाचें उक्तावण सिनेमा म्हणून आमंत्रीत केलां. गोंय मुक्ती दिसा सुरू जावपी हो तीन दिसांचो महोत्सव तेलंगण सरकाराच्या तेलंगण चित्रपट विकास महामंडळाच्या सौजन्यान दादासायब फाळके स्कूल ऑफ फिल्म स्टडीस आयोजीत करता. ह्या महोत्सवात आंतराष्ट्रीयी कीर्तीचे संवसारभरचे लघुपट तशेंच भारताच्या प्रादेशीक भाशांचे लघुपट प्रदर्शीत करतले. तीन दिसांच्या ह्या महोत्सवांत स्पर्धात्मक, बिगर-स्पर्धात्मक, उत्तर-पूर्व पॅव्हॅलियन आनी दायज आनी पुरावलोकनी लघुपटांचो आसपाव आसतलो. अंदूंच्या महोत्सवाक अमेरिका आनी युरोप सयत संवसारभरच्यान ७०४ अर्ज आयल्यात.
ह्या आंतरराष्ट्रीय चित्रपटाचो पड्डो ‘आसेसांव’ ह्या चित्रपटान उक्तो करचो म्हणून आयोजकांनी दिग्दर्शक मंगिरीश बांदोडकार हांकां आमंत्रीत केला. टोरोंटोतल्या दक्षीण आशियाई चित्रपट महोत्सवांत ‘आसेसांव’न उत्कृष्ट चित्रपटाचो पुरस्कार मेळयिल्लो. तशेंच टोरोंटोंतूच उत्कृश्ठ अभिनयाचो पुरस्कार मेळयिल्ली प्रशांती तळपणकार हीय ह्या हैद्राबाद महोत्सवाक हाजीर रावतली.
हैद्राबाद महोत्सवांत आमंत्रित करपाचो उद्देश सांगतना आयोजकांनी म्हणलें, जाण्टेंपण आनी एकलेपणाक तोंड दितना येवपी आव्हानांचे चित्रण सामकें संवेदनशील पद्धतीन ह्या लघुपटांत चित्रायलां. तशेंच ह्या चित्रपटांतली मुखेल जाण्टे बायलेची भुमिका करपी कलाकारान हो चित्रपट एका वेगळ्याच उंचायेर व्हरून दवरला.
भारतांतले एक उत्कृष्ट चरित्र अभिनेता आनी दिग्दर्शक म्हणून मान्यताय मेळिल्ले नसीर हे ह्या महोत्सवाच्या परीक्षक मंडळाचे अध्यक्ष आसात. तशेंच ‘इक्बाल’ फेम लेखक आनी दिग्दर्शक नागेश कुकुनूर, सिने समीक्षक आनी साहित्यिक मैथिली राव, राष्ट्रीय पुरस्कार जैतिवंत उत्पल बोरपुजारी, पटकथा लेखक, दिग्दर्शक आनी संपादक बिप्लब गोस्वामी आनी सिक्किमचे सिने दिग्दर्शक अभिषेक चेत्री हांचोय ह्या परीक्षक मंडळात आसपाव आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
