भांगरभूंय | प्रतिनिधी
उमरंगसो, खबरां संस्था: आसामांतल्या दिमा हासाओ जिल्ह्यांतल्या तीन किलो वाठारांतले कोळसो खणींत आडकल्ल्या आठ कामगारांक वाटावपाचे यत्न सध्या चल्ल्यात. सकाळीं ९ वरांचेर एनडीआरएफ आनी लश्कराच्या २१ पॅरा डायव्हर्सांक खणींत १०० फूट उदकांत एका मजुराची कूड सांपडली. तांणी ती भायर काडली, मात वळख पटूंक ना. सोमारा सकाळीं ८ वरांचेर उरिल्ले कामगार (रॅट मायनर्स) ३४० फूट खोल खणींत आडकल्ले. ते खणीच्या खंयच्या भागांत आसात, हें सोदपाक लश्कर आनी नौदळान विशेश रोबोटीक उपकरणां खणींत धाडल्यांत.
रेस्क्यू ऑपरेशनांत वांटेकार जाल्ले एनडीआरएफचे डेप्युटी कमांडर एन के तिवारी हांणी सांगलें, पयलेच फावट अशे तरेची स्थिती निर्माण जाल्या. हें खूब आव्हानात्मक आसा. बुधवारा आर्मी आनी एनडीआरएफच्या पाणबुड्यांचो पंगड स खेपो सकयल देंवलो. मात, आमचे पाणबुडे उदकांत ३५ ते ४० फुटां परस चड सकयल देंवपाक शकले नात. कारण सकयल उदक चड आसा आनी वयर कोळशाची रास आसा. नौदळाचे १२ पाणबुडे तज्ञ आसात. तांचे कडेन सोनार इमेजिंग उपकरणां आसात, मात तीं राशी भितर फोटो काडपाक सक्षम नात.
नौदळान सांजेवेळार रिमोट ऑपरेटेड व्हेइकल (आरओबी) उदकांत धाडलें. जाचे वरवीं कांय फोटो धाडले. खाणीचे वणटींत जायते बोगदे आशिल्ल्याचें दिसून येता. जे ह्या रॅट मायनर्स म्हळ्यार कामगारांनी खणल्यात. हे बोगदे २५० मीटर लांब आनी ३ फूट रुंद आसात. ज्या बोगद्यांतल्यान उदक व्हांवता थंय कोणाकूच धाडूंक ना.
घडणुके सुवातेवेल्या एका अधिकार्यान म्हणलें, ऑपरेशन २४ वरां सुरू आसा. परिस्थिती पळयल्यार उरिल्ल्या कामगारांची जगपाची आस्त उणी आसा. जर ते बोगद्यांत आसल्यार, त्या सगळ्या बोगद्यांनी उदक भरलां. ओएनजीसीन उदक भायर काडपाक एमआय-१७ हेलिकॉप्टरांतल्यान उच्च शक्तीचो पंपूय धाडला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
