भांगरभूंय | प्रतिनिधी
दिसपुर, खबरां संस्था ः आसामांत बीफाचेर बंदी घाल्या. आसामाचे मुख्यमंत्री हिमंता बिस्वा सरमा हांणी पत्रकार परिशद घेवन ही म्हायती दिली. आसाम मंत्रीमंडळान हो निर्णय घेतला. जांतूंत राज्यांतल्या हॉटेलांनी, रेस्टॉरंटांनी आनी भौशीक सुवातींनी बीफाचेर बंदी घाल्या.
समगुरी लोकसभा मतदारसंघांतल्या पोटवेंचणुके खातीर 13 नोव्हेंबराक मतदान जाल्लें. 23 नोव्हेंबराक निकाल जाहीर जाले उपरांत खासदार रकीबुल हुसैन हांणी काँग्रेसीच्या हारी उपरांत भाजपाचेर गोमांस वांटिल्ल्याचो आरोप केल्लो. हाचेर सरमा हांणी शेनवारा पत्रकार परिशद घेतली. ‘काँग्रेसीन तशें लेखी दिल्यार राज्यांतल्या गोमांस विक्रीचेर बंदी घालपाक आमी तयार आसात.’ अशें सरमा हांणी ह्या वेळार सांगलें.
भारतांत गोहत्या करपा विशीं कसलोच कायदो ना. पूण वेगवेगळ्या राज्यांनी अशे कायदे करतात. हरियाणांतल्या गोहत्या बंदी कायद्याचें उल्लंघन केल्यार एक लाख रुपया दंड आनी 10 वर्सां बंदखणीची ख्यास्त दिवपाची तरतूद आसा. छत्तीसगढ हें एकमेव राज्य जंय गाय आनी म्हशींच्या मांसाचेरूय बंदी आसा. बिहार, झारखंड, ओडिशा, तेलंगना, आंध्र प्रदेश, तमिळनाडू, कर्नाटक, गोंय आनी केंद्रशासित प्रदेश दमण आनी दीव, दादरा आनी नगर हवेली, पुडुचेरी आनी अंदमान निकोबारांत आंशिक निर्बंध लागू केल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
